पणजी:
कोंकणी साहित्य, नाट्य, आनी सांस्कृतीक एकवटांत दिल्ल्या आजीवन योगदाना खातीर नामनेचे नाट्यकार, साहित्यीक पुंडलिक नायक हांका अंदूचो विमला व्ही.पै जीवन-सिद्धी सम्मान भेटयलो.
कोंकणी भास, संस्कुताय आनी चळवळींत नायक हांच्या गिरेस्त योगदाना खातीर ह्यो पुरस्कार तांका प्रदान केलो, अशे या वेळार संस्थेन सांगला.
1 नोव्हेंबराच्या मुखेल सुवाळ्याक तांकां हाजीर रावंक मेळनाशिल्ल्यान विश्व कोंकणी केंद्राचे अध्यक्ष नंदगोपाळ शेणोय हांच्या निर्देशा खाला आनी उपाध्यक्ष डॉ. किरण बुडकुले हांच्या मार्गदर्शनाखाल मानकुल्या सुवाळ्यांत पुंडलिक नायक हांका ह्यो पुरस्कार तांच्या घरा भेटयलो. शाल, हार, मानचिन्न आनी एक लाख रुपयांचो चेक ह्यावेळार तांका मानेस्तांनी भेटयलो. विश्व कॊंकणी केंद्राच्यो उपाध्यक्ष डॉ. किरण बुडकुले, ज्येश्ठ नाट्य दिग्दर्शक आनी कलाकार श्रीधर कामत बांबोळकार, साहित्य अकादेमी पुरस्कार प्राप्त लेखिका हेमा नायक, कवी उदय म्हांबरो, हरेकल पुंडलीक पै तशेच कवयित्री नुतन साखरदांडे ह्यावेळार हाजीर आसली.
राजभास आंदोलनाच्या 555 दिसांच्या कोंकणी भास आनी चळवळी वेळार नायक हांणी केल्ल्या फुडारपणाचेर या वेळार वक्त्यांनी भर दिलो. कोंकणीक गोंयची राजभास म्हूण मान्यताय मेळोवपा खातीर केल्ल्या येसस्वी आंदोलनांत कोंकणी प्रजेचो आवाजाचें टिकावू फुडारपण हो तांचो म्हत्वाचो वावर. तशेच सगळ्या थरांतल्या कोंकणी तरणाट्यांक कोंकणी साहित्य चळवळीत वांटेकार करून घेवन प्रतिभावान तरणाट्यांची शक्त तांणी उबारली अशे ह्यावेळार उलयताना डॉ. बुडकुले हांणी म्हळें.
कार्यावळीचे सुर्वेकच उदय म्हांबरो हाणीं त्याच दिसा अंतरिल्ल्या स. अशोक भोंसलो हांच्या कोंकणी खातीर दिल्ल्या खडेगांठ योगदानाची उपस्थितांक याद करून दिली. ह्या वेळार तांकां आदरांजली म्हणून दोन मिनटां शांतताय पाळ्ळी.
युगांक नायक हांणी सगळ्यांक येवकार दिलो. उदय म्हांबरो हांणी ह्या कार्यावळीचो उद्देश आनी केंद्रबिंदू सांगून प्रास्तावीक केले. श्रीधर कामत बांबोळकार हाणी ह्यावेळार पुंडलीक नायक हांचो गौरव करपी उलोवप करतना तांच्या लेखन, नाट्य चळवळीतल्यो यादी जागयल्यो. ह्यावेळार डॉ. जयंत बुडकुले, गीता कामत बांबोळकार तशेच राजेंद्र नायक, महादेव नायक, हिरू नायक, सुकांती नायक, श्रीकांत नायक, आनी बाबा प्रसाद आदी इश्ट परिवार हाजीर आसलो.
भोवमानाक जाप दितना पुंडलिक नायक हांणी फाटल्यो कांय यादी सांगल्यो. आपुण केन्ना पुरस्कारा फाटल्यान धावलो ना. पुरस्कार आपले फाटल्यान आयले अशें तांणी म्हळें. जीवन सिद्धी पुरस्कार भेटयल्ले खातीर विश्व कोकणी केंद्राचे तांणी उपकार आठयले.
