मडगांव :
वाचन संस्कृती वाडपांत ग्रंथपालांची व्हड जापसालदारकी आसता. गांवगिर्या वाठारांनी वाचनाची आवड वाडटना दिसना. मात, राज्यांत ४८ नवीं वाचपघरां सुरू जाल्यांत. तशेंच ७९ आदल्या वाचनालयांचें नुतनीकरण करतले अशी म्हायती कला आनी संस्कृती मंत्री गोविंद गावडे हांणी दिली.
कला आनी संस्कृती खातें, कृष्णदास शामा गोवा राज्य सेंट्रल वाचनालय, डॉ. फ्रान्सीस लुईस गोम्स जिल्लो वाचनालय हांचे वतीन जिल्लो वाचनालयांत राष्ट्रीय ग्रंथपाल दीस मनयलो. ह्या वेळार मंत्री गोविंद गावडे, आमदार दिगंबर कामत, कला आनी संस्कृती संचालक सगुण वेळीप, सेंट्रल लायब्ररीचे क्युरेटर सुशांत तांडेल, रक्षा खोबरेंकार आनी हेर हाजीर आशिल्ले.
मनशाची दुरदृश्टी जर बरी आसत जाल्यार ताचो लाव जायते जाण घेतात, ताचेर येस निंबून आसता. भाशे खातीर वा हेर कारणां खातीर आंदोलनां जातालीं. मात आतां ती स्थिती उरूंक ना. वैयक्तीक उदरगत जेन्ना जातली, तेन्नाच भौशीक उदरगत जातली. मनशाची उदरगत ताचे कडल्या ज्ञानाक लागूनच जाता. विचार वाडपाक पुस्तक वाचपाची संवय लावन घेवप गरजेची. वाचन संस्कृती वाडोवपाक ग्रंथपालांची व्हड जापसालदारकी आसता, अशें गावडे हांणी सांगलें.
वाचनाची ही संस्कृती राज्यभर पावोवपाची गरज आसा. हातूंत सगळ्यांनी वांटो घेवप गरजेचें. तरणाटे पिळगेक वाचनाकडेन हाडपाचो यत्न करचो अशें सगुण वेळीप हांणी सांगलें.
आमदार दिगंबर कामत हांणी राष्ट्रीय ग्रंथपाल दीस मनयतना भाऊसायब बांदोडकर हांचे पुण्यतिथी निमतान तांकां वंदन केलें. देशांत कितल्योय सुविधा जरी जाल्यो तरी जेन्ना जनता वाचनाचे दिकेन वळटली तेन्नाच देश घटमूट जातलो. वाचनसंस्कृती वाडपाची गरज आसा. वाचनालयांनी भुरग्यांनी येवपाची गरज आसा. भुरग्यांच्या हातांत मोबायल दिवचे परस पालकांनी भुरग्यांक वाचन करपाक शिकोवपाची गरज आसा. शिक्षण खात्या कडल्यान कला आनी संस्कृती खात्यान ग्रंथालयां घेतले उपरांत वाचनालयांची खूब उदरगत जाली. ल्हानपणा सावन वाचनाची संवय लावन घेवपाची गरज आसा. विधानसभेंत बरें वाचनालय आसा. मात तातूंत कितले आमदार वतात हें खबर ना, अशें तांणी सांगलें.
राज्यांत ४८ नवीं वाचनालयां सुरू केल्यांत आनी ४९ आदल्या वाचनालयांचें नुतनीकरण केलां. सरकार गरजेच्यो सुविधायो दिवपाक शकता, जागृताय करपाक शकता. मात ताचो लाव घेवपी वाचक वाचनालयांनी येवपाची गरज आसा. देवळांत लागपी रांगा प्रमाण वाचनालयांनीय त्यो लागतल्यो तेन्ना समाजाची खरी उदरगत जातली. देवा कडेन बरी बुद्ध मागल्यार ती मेळची ना. ते खातीर वाचनालयांची पायरी चडपाची, वाचन वाडोवपाची गरज आसा, अशें मंत्री गावडे हांणी सांगलें.
भाशण करतनाय पुस्तकांतले संदर्भ घेवचे पडटात. वाचनाची आवड निर्माण करची पडटा. राजकारण हें फकत राजकारणा पुरतेंच आसता. अज्ञानाक लागून निर्माण जाल्लो विरोध कांयच उपेगाचो नासता, अशेंय तांणी म्हणलें.
