कोंकणीचो रथ (कविता)

– आर.एस.भास्कर

मुखार चलात मुखार चलात/
भावांनो…….
भयण्यांनो …….
मुखार चलात मुखार चलात.

भिरांकूळ रातीक ना करूंक/
पूर्वज्यांनी जळयल्यो दिवट्यो/
आनी नाकात आनी नाकात/
हात सोडात मेकळून हालेयात/
मुखार चलात मुखार चलात.

अदृष्टाची ओवी विसरूं दियात/
जागोर पदां उमेदीन गायात/
नीट रावात हात घेयात/
मुखार चलात मुखार चलात.

उदेत आयला वेळु सामकी/
विसकळ बांदला नवो रस्तो/
संदेह नाका अधीर नाका/
मुखार चलात मुखार चलात.