कोची/वेंडुरुत्ती:
हेनरीक व्हॅनरीड ह्या कोचीच्या डच्च गव्हर्नरान 1678 ह्या वर्सा आमस्टरडाम हांगा सावन छापिल्या होर्तूस मलबारिकूस नावाच्या वनस्पत शास्त्र ग्रंथांचा निर्माणाक लागून कोचीच्या तीग कोंकणी वैज्यांनी म्हत्वाचे काम केल्ले तरीय दुरदैवान हांच्या वावराचेर आडनदर जाली अशें सहीत्यीक आर.एस.भास्कर हांणें सांगलें. कोची कट्टारीबाग हांगाच्या वेंन्डुरुती इगर्जीच्या पारीष सभाघरांत चरित्रअन्वेषी (इतिहास सोदपी) संस्थेचे वतीन हेनरीक व्हॅनरीड हांगेल्या 333व्या स्मृती दिसाचे निमितान घडेयल्या.
‘हेनरीक व्हॅनरीड आनी होर्तूस इंडिकूस मलबारिकूस’ चरच्या सत्रांत मोडरेटर ह्या नात्यान ते उलेयतालें. व्हानरीड कोचीचे गव्हर्नर ह्या नात्यान बेस बरें काम केल्ले आनी ‘होर्तूस इंडिकूस मलबारिकूस’ हो 12 खंडाचो विज्ञानीक ग्रंथ सन्मान केल्लो म्होण तांचे नांव अजंवर जाल्ले.
प्रस्तुत ग्रंथाच्या रचनेक खातिर तीग कोंकणी बामण वैज्यांनी रातदीस रावून सुमार दोन वर्सां काम केल्ले आनी हांतु आसपावून घेतील्या वनस्पतीचे विशी आनी तांच्या गुणाचे संबंधित साक्षपत्र बी दिल्ला. ग्रंथाच्या अवतारीकेंत योगदानांचे तोल मानून कोंकणी वैध्यांचे नांव पयलें दिल्ला. अशें आसतनाच हांगेल्या वावराचेर आडनदर दिवन आनी एक वैध्याचें काम म्हत्वाचे म्होण आजून प्रचार जाता. अशें भास्कर हांणे परतून सांगलें.
चरित्रअन्वेषी संस्थेचे अध्यक्ष एफ.आंटणी पुतूर हांणे प्रपत्र सादर केल्ले. होर्तूसाच्या निर्माणांत कोंकणी वैध्यांचो चडात चड वावर जाल्ला अशी ताणें सांगले. षेवलियार डाॅ.ग्रिगरी थाॅमास माळियेक्कल हांणे प्रतिस्पंदनाची उतरां उलेयली.
होर्तूसाच्या वावरांत आशिल्ले मात्येवूस पाद्री, मलयाळम काव्य साहित्यांत योगदान दिल्ले आरणोस पाद्री हांचे विशींय विंगडविंगड परिचर्चा घडल्यो.
सुरवेक केरळ सरकार ह्युमन रेट्स कमिशनाचे अध्यक्ष जस्टिस अलक्साडर थाॅमास हांणी कार्यावळीचे उक्तावण केल्ले. कोचीन पोर्ट ट्रस्ट अध्यक्ष बी.काशीविश्वनाथन अय.आर.एस.एम.ई. हांणी ‘डोक्ट्रीना क्रिस्ताव’ ह्या कृतीचे 446 वर्सां आदीं तमीळ भाशेंत छापिल्या ‘तांपिरान वणक्कम’ ह्या पुस्तकाची प्रती आमदार टी.जे विनोद हांका दिवन पुन:प्रकाशन केल्ले. रवेरंड फा.रोय थोट्टम एस.जे.,जोसफ थाॅमास पालयक्कल, आंटणी पुत्तूर चात्तियात आनी जॅस क्रिस्टफर माळियेक्कल हांणीं उलेयलें.
