मुख्यमंत्री एकनाथ शिंदे हांच्या पंगडाक शिवसेनाचें नांव आनी धनुश्य बाणाचें चिन्न दिवपाचो वेंचणूक आयोगान घेतिल्लो निर्णय स्थगीत करपाक सर्वोच्च न्यायालयान न्हयकार दिलो.
पूण शिंदे गटान कसलोच व्हिप काडचो ना आनी फुडले सुनावणी मेरेन ठाकरे गटा आड कसलीच कारवाय करची ना अशें उतर शिंदे पंगडान आयज न्यायालयाक दिलें. ह्या प्रकरणांतली फुडली सुनावणी दोन सप्तकां उपरांत जातली, ते मेरेन ठाकरे गटाक आंशिक सुटका मेळ्ळ्या कारण तांकां “शिवसेना उद्धव बालासाहेब ठाकरे” हें नांव आनी मशाल हें चिन्न वापरपाक मेळटलें.
मुख्य न्यायाधीश धनंजय चंद्रचूड हांच्या फुडारपणा खाला स्वतंत्र संविधान खंडपिठा मुखार ही याचिका सुनावणी जाली. ठाकरे पंगडान पयलीं उच्च न्यायालयांत वचचें असो युक्तिवाद केलो. ह्या वेळार ठाकरे गटाचो वकील कपिल सिब्बलान वेंचणूक आयोगाचो निर्णय स्थगीत करचो अशी मागणी केली. पूण आयोगाच्या निर्णयांत उल्लेख नाशिल्ल्या गजालींचो उल्लेख कसो करचो? हाचेर प्रस्नचिन्न उबें करून न्यायालयान स्थगीत करपाक न्हयकार दिलो.
मजगतीं आयोगाचो निर्णय स्थगीत जालो ना जाल्यार खंयचें मळब कोसळपाचें आसा? न्यायालयान ठाकरे पंगडाक विचारलें. हाचेर “शिंदे गट मालमत्ता, बँक खातें हातांत घेवपाचो यत्न करता.” ते भायर व्हीप जारी करूं येतात आनी आमदारांक निलंबीत करूं येतात. हाका लागून स्थगीत करप गरजेचें आसा’ अशें सिबालान सांगलें. पूण फुडले सुनावणे मेरेन व्हिप जारी करचे नात वा निलंबीत करचे नात अशें न्यायालयान नोंद जाल्ल्या शिंदे गटाचे वकील नीरज कौल हांणी सांगलें.
