Sahitya Academy : कोंकणी कथालेखक म्हणून नामनेक पाविल्ले डॉ. प्रकाश पर्येंकार हांच्या ‘वर्सल’ ह्या पयल्या कथा संग्रहाक आयज साहित्य अकादमी पुरस्कार जाहीर जालो. तांकां हो पुरस्कार १२ मार्च २०२४ दिसा नवी दिल्लीच्या कमानी ऑडिटोरियमांत भेटयतले. तशेंच मराठींत कृष्णात खोत हांच्या ’रिंगाण’ कादंबरीक हो पुरस्कार जाहीर केला.
साहित्य अकादमीचे (Sahitya Academy) अंदूंचे पुरस्कार आयज जाहीर जाले. हातूंत ९ कविता संग्रह, ६ कादंबर्यो, ५ कथासंग्रह, ३ निबंध आनी एक टिकात्मक पुस्तकाचो आसपाव आसा. हातूंत गोंयचे कोंकणी साहित्यीक डॉ. पर्येंकार हांच्या ‘वर्सल’ कथासंग्रहाक जाल्यार कोल्हापुरांतले साहित्यक प्रा. कृष्णात खोत हांच्या ‘रिंगाण’ हे कादंबरीक हो पुरस्कार जाहीर जालो.
डॉ. प्रकाश पर्येंकार हांणी तांच्या वाठारांत तांकां मेळिल्ल्या पात्रांच्या दुख्ख, खोशयेंत वैश्वीक मुल्यांच्यो खुणो पळयल्यो आनी त्या पात्रांक कथेंत रंगयले. अशे तरेच्यो कथा बरोवपा खातीर गांवांतल्या लोकां मदीं मेळून मिसळून रावप गरजेचें. डॉ. पर्येंकार हांणी गांवच्या लोकांचें जगणें, त्या लोकांचेर जाल्लो अन्याय ह्या कथेंतल्यान मांडला. तांच्या खुबश्या कथांचो अणकार हिंदी, मल्याळम, मराठी, उडिया, उर्दू, कन्नड, काश्मिरी अश्या विंगड विंगड भारतीय भाशांनी तशेंच इंग्लीश आनी पुर्तुगेज भाशांनीय जाला. तशेंच तांच्या खुरीस, चंद्रकोर आनी काजरो ह्या कथांचेर चित्रपटूय जाल्यात. ‘काजरो’ ह्या तांचे कथेचेर निर्माण जाल्ल्या चित्रपटाक राष्ट्रीय पुरस्कारूय फावो जाला. Sahitya Academy
