कोची- केरळचे नामनेचे कोंकणी कवी के. अनंत भट (85) हांकां आयज शुक्रारा सकाळीं मरण आयलें. कांय दिसां आदीं भलायकी इबाडिल्ल्यान तांकां कोचीच्या हॉस्पिटलांत दाखल केल्ले. थंय उपचार चालू आसतना आयज सकाळीं तांकां मरण आयिल्ल्याची म्हायती तांचे लागींचे वांगडी रमेश पै हांणी दिली. फाल्यां शेनवारा 13 जुलयाक तांचे कुडीचेर निमणे संस्कार जातले. तांच्या फाटल्यान तांची घरकान्न, पूत आनी लग्न जाल्ली धूव आसा.
अनंत भट हे एक प्रतिभावान कवी आसले. स्वतंत्र कविता निर्मिती वांगडाच तांणी जायत्या पुस्तकांचो अणकार केला. ‘श्री रामचरित मानस’ ह्या संत तुलसीदास हांच्या हिंदी पुस्तकाच्या कोंकणी अणकाराक लागून तांकां 2006 वर्सा केंद्रीय साहित्य अकादमीचो अणकार पुरस्कार फावो जालो. तुलसीदास, सुरभजनमाला, संगीत रूपकां, कोंकणी गीतमाला अशीं ताचीं जायतीं पुस्तकां उजवाडाक आयल्यात. 1980 वर्सा केरळांत प्रदर्शीत जाल्ल्या ‘तपस्विनी’ ह्या कोंकणी चित्रपटाचे ते संवाद लेखक आशिल्ले. ताचें पद्यरुपी आत्मचरित्र ‘अनंथू’ 2012 वर्सा प्रकाशित जाल्लें.
