अनुग्रहा चॅरिटेबल ट्रस्ट आनी आपु भट-रंग भट-विनायक पंडित स्मारक समितीन मेळनु “होर्तूस सायाह्न” – कोंकणी साक्ष्यपत्राचें ३५० वें वर्षाचें पर्व २० एप्रिल २०२५, आयतारा सांजे ४.३० वरांचेर कोच्चींत योग्य पै नारायण पै ट्रस्ट सभाघरांत मनायलें.
सतराव्या शेंकड्यांत कोच्चीचे डच कुमदोराचे निरोपान रचिल्ले १२ खंडांचे “होर्तूस इंडिकूस मलबारिकूस” सस्यशास्त्र ब्रहद् ग्रन्थांत तां आपु भट, रंग भट आनी विनायक पंडित ह्या कोंकणी वैद्य त्रयांनीं दोन वर्सां काम करून काय कसलें योगदान तानिं केलें म्हणून कोंकणीन देवनागरी लिपीन प्रमाणपत्र बरवून स्वाक्षरी घालेलें.
कोंकणी सायाह्न कार्यक्रमांत पयले, कोंकणी लेखक आनी कार्यकर्ता श्री एस.रामकृष्ण किणी हांणी आयोजीत केल्लो होर्तूसाचेर आधारित क्विस कार्यावळ “होर्तूस प्रश्नोत्तरी” आसली.
उपरांत कोंकणी कवी आनी साहित्यकार श्री. एन बालकृष्ण मल्या हांणी बरयल्लें आनी कोंकणी कार्याकर्ता एवं टीडीएलपी शाळेंतली कोंकणी अध्यापिका श्रीमती. सरस्वती एस. प्रभु हांच्या मार्गदर्शनाखाल भुरग्यांनी सादर केलेलें कोंकणी लघु नाटक. – “कोंकणी साक्ष्यपत्र” खेळेयलें.
मागीर, प्रार्थना एवं स्वागत गानाचे संग अनुग्रहा चॅरिटेबल ट्रस्टाचो सचिव श्री. एन. मुरळीधर पै हांचे अध्यक्षपणाखाला नामनेचे व्यक्ती हाजीर जालेली भौशीक बसका सुरू जाली. ए.आर.वी स्मारक समितीचे संयोजक श्री एन.रमेश कुमार पै हाणी सगळ्यांक येवकार दिलो. उपरांत श्री मुरळीधर पै हाणी अध्यक्ष भाषण केलें.
वरिष्ठ कोंकणी कवी आनी लेखक श्री. शरतचंद्र शेणै हाणीं “होर्तूसांतल्या कोंकणी प्रमाणपत्राच्या 350व्या वर्साची वळख” दिली.
मुखेल सोयरो तिरुवनंतपुरम दूरदर्शन केंद्राचो सह संचालक डॉ. पी.आर. हरीन्द्र शर्मा हाणीं दिवली पेटवून कार्यक्रमाचें उक्तावन केलें आनी मुखेल भाशण दिलें.
उपरांत, श्री. एन बालकृष्ण मल्या हांणी बरयल्लें “होर्तूस मलबारीक्कूसुं कोंकणीगळुडे पङ्गुं” ह्या मलयाळम पुस्तकाची तिसरी आवृत्ती आनी डॉ प्रतिमा आशर हीणे केलेलें “होर्तूस मलबारीकस & दि कोण्ड्रिब्यूषन ऑफ कोंकणीस” ह्या इंग्लीश अणकाराची दुसरी आवृत्ती मुखेल सोयराचे हस्तुकी प्रकाशित जाली.
वरिष्ठ कोंकणी साहित्यकार श्री. आर.एस.भास्कर आनी नामनेची इतिहासकार, स्तंभलेखिका डॉ. प्रतिमा आशर हानीं कार्यावळीक शुभाशय दिले.
प्रश्नोत्तरिंत विजय घेत्तिल्यांक आनी नाटकांत अभिनय केल्लेले भुरग्यांक इनामां वांटून दिली.
बसकेचे आंत्यार, प्रोफ. के.एन.आर. भट हाणी समेस्तांक धन्यवाद सांगलो.
