कविता ट्रस्ट हांणी दिंवचो 2023व्या वर्साचो मथायस कुटम कविता पुरस्कार कवी प्रकाश दत्ताराम नायक हांकां फावो जाला. हो पुरस्कार रू. 25,000, यादस्तिका आनी प्रमाण पत्र आटाप्ता. जानेर 14, 2024 तारकेर मंगळूर लागसारच्या पुत्तूरांत चलच्या आट्राव्या कविता फेस्त संदर्भार हो पुरस्कार तांकां भेटयतले.
प्रकाश दत्ताराम नायक गोंयच्या रायबंदरांत 1962 दशेंबर 22 तारकेर जल्मलो. मुंबय विश्वविद्यालय थावन बि.ए. पद्वी जोडतच शिक्षक जावन ताणे वावर केलो आनी आतां निवृत्त जिणी जियेता.
तांणी 1979 वर्साथावन कविता बरोवंक धरल्यो. तांची ’चैतर’ (1987), ’कस्तूरगंध’ (2005), ’कुतल्ल’ (2015), ’मोडकूळ’ (2022) – अशें च्यार कविता संग्रह पर्गट जाल्यात. ह्या भायर ’अस्तुरी -शिमेभायलें मळब’ (2014), ’साग्रसंगीत’ (2022), ’तांब सुर्या हांव’ (डिजिटल ई बूक – 2022) – अशें गद्य लेखनांचीं पुस्तकां तांचीं पर्गट जाल्यांत. तांणी नाटकां, मटव्यो कथा, गितां, विज्ञान नाटकां लिखल्यांत. तांच्यो कविता गोंयच्या सेकेंडरी तशें हैयर सेकेंडरी शाळेंनी शिकयतात.
’तूं आनी हांव’ (कोंकणी), ’संघर्ष’ (हिंदी), ’सुलूस मुखावेल्या त्सुनामिची’ (कोंकणी), ’दी सर्वैवल’ (इंगलीष) – लघू सिनेमा तांणी निर्माण केल्यांत. तांचीं हीं फिल्मां अंतराष्ट्रीय फिल्म फेस्टीवलांनी प्रदर्शीत जाल्यांत.
अखिल भारतीय कोंकणी साहित्य संमेळन, आकाशवाणी, गोंय दूरदर्शन, इनस्टिट्यूट मिनेजस ब्रगांजा, कला अकाडेमी, कोंकणी अकाडेमी, साहित्य अकाडेमी – अशें वेवेगळ्या संस्थ्यांनी मांडून हाडल्ल्या कविगोष्टींनी, सेमिनारांनी ताणे वांटो घेतला.
तांकां कोंकणी भाषा मंडळ, गोंय पुरस्कार (चैतर- 1988), (कुतल्ल – 2016), वी. एम. साळगांवकार पुरस्कार (1990) – अशें जायते पुरस्कार लाभल्यात.
कविता ट्रस्टाचो मथायस कुटम कविता पुरस्कार मेरीट फ्रैट सिस्टम्स, दुबाय हाचो आडळत्या निर्देशक जावनासच्या कुप्पेपदवुच्या जोसेफ मथायसान आपल्या कुटमाच्या नांवान दिंवचो जावनासा. हाचे आदीं हो पुरस्कार गोंय, कर्नाटक, केरळ, मुंबय प्रदेशांतल्या पंद्रा कवींक फावो जाला. ह्ये वळेरींत प्रकाश दत्ताराम नायक सोळावो.
