‘होर्तूस ग्रंथांवेल्यान कोंकणी आयुर्वेद वैज्यांचो ज्ञान सिध्द जालो’

वडकरा:

आयुर्वेद वैद्यशास्त्रांत कोंकणी लोकांक पारंपरीक ज्ञान आशिल्लो हे समजूनच  हेनरीक व्हॅनरीड हांणे आपलो होर्तूस इंडिकूस  हो ग्रंथ तयार करतना कोंकणी वैज्यांचो आदार घेतलो अशे कोंकणी साहित्यीक आर.एस.भास्कर हांणें सांगलें.  केरळांत कालिकट लागसार वडकरा शारांत समुद्रा आयुर्वेद संसोदाक केंद्राच्या  वतीन वडकरा नगरपालिका सभाघरांत घडेयल्या होर्तूस मलबारिकूस ग्रंथा विशींची परिचर्चा उक्तावण करून तें उलेयताले.  ह्या विख्यात ग्रंथांत कोंकणी भास तशेंच मलयाळम भास आस्पाविल्यान दोनय भाशेचे यस वाडलें अशेय ताणीं आपल्या उलोवपांत सुचयलें.

पयलीं भास्कर हांणीं वानरीड हांणे ३५० वर्सां आदीं कोचींत तयार करनु आमस्टरडाम हांगा सावन छापिल्या हो बारा खंडाचो पुस्तक मूळ लॅटीन भाशेंवेल्यान इंग्लीश तशेंच मलयाळम भाशेंत भाशांतर केल्लेल्या हालीच अंतरले डाॅ.के.एस.मणिलाल हांका आर्गां ओंपली.

हरितामृतम संस्थेचे उपाध्यक्ष तायुळ्ळातील राजन हांणें यजमानपण चलयलें. निवृत्त डि.वै.एस.पी.  पी.पी.उण्णीकृष्णन हांणी विषयावतरण केल्ले.  निवृत्त केरळ विद्यापीठ नर्सिंग सुपरवैसर ए.के.विनोदा तिरुवनंतपुरम आनी निवृत्त एस.अय. वी.विद्याधरन चेरतला हांणीं चर्चेंत वांटो घेवन उलयलें.  समुद्रा संसोदाक केंद्राचे वेवस्थापक डाॅ.पी.के.सुब्रमण्यन हांणें येवकार दिल्लो जाल्यार कणवीनर ए.पी.मोहनन हांणें उपकार मागलो.