एरणाकुळम:
२८वो कोची अंताराष्ट्रीय पुस्तकोत्सवाचे आदरणीय उत्तरप्रदेस राज्यपाल भौमानेस्त श्रीमती आनंदीबेन पटेल हांणी परंपरीक दिवली पेटोवन उक्तावण केल्ले.
एरणाकुळम एरणाकुळत्तप्पन ग्रौंड हांगा ‘महाकवी अक्कीत्तम’ वेदीचेर माजी केन्द्रीय मंत्री आनी पुस्तकोत्सव समितीचे अध्यक्ष प्रोफ.के.वी.तोमस हांचे यजमानपणार घडयलें उक्तावण सुवाळ्यांत राज्यपाल श्रीमती आनंदीबेन पटेल हांणी बंगाळ राज्यपाल भौमानेस्त डाॅ.सी.वी.आनंद बोस हांका ‘मलयाळम रत्न’ पुरस्कार भेटेयलो.
मालगडे साहित्यीक के.एल.मोहन वर्मा हांणी पुस्तकोत्सवाचे संदेश दिलो. माजी केंद्रीय मंत्री आनी प्रसस्त साहित्यकार एम.जे.अकबर हांणे सांस्कृतिक कार्यावळीचे उक्तावण केल्ले. कोची मेयर एम.अनिलकुमार हांचे सस्तुकी ह्या वेळार पुस्तक प्रकाशन बी जालें. फ्रँच साहित्यीक क्ळारा ले मयकळ, पुस्तकोत्सवाचे सचीव इ.एम.हरिदास, पी.सोमनाथन
हांचें ह्या वेळार उलोवप जाले.
पुस्तकोत्सव नवेंबर १० तारिखेक सोंपतलें. दर दिस पुरस्कार समर्पण कार्यावळ, साहित्यीक कार्यक्रमां, कवि संम्मेळनां, भुरग्यां साहित्याचेर चर्चा, भहुभाशा संगमम कार्यावळ, पुस्तक प्रकाशनां आनी संस्कृतीक कार्यावळ जातली.
दा दिसाच्या उत्सवांत साहित्य अकादमी, नॅशनल बुक्क ट्रस्ट, भाषा इन्स्टिटय़ूट, राज्यातली आनी राज्या भायली सबार संस्थेचे पुस्तक-कोटी आस्तल्यो.
नवेंबर ७ तारिखेक सांजेचे ४ वरार लक्ष्मीदास बोरकार जन्मशताब्दी समारोह समितीचे आनी कोची अंताराष्ट्रीय पुस्तकोत्सवाचे जोड पालवान घडोवपी पुस्तक प्रकाशन सभेंत आदरणीय केरळ राज्यपाल भौमानेस्त राजेंद्र विश्वनाथ आर्लेकार वांटो घेतलें. गोंय सुटकेझुजांत प्रत्यक्ष सहभागी लक्ष्मीदास कृष्ण बोरकार हांणी रचिलो ‘अठरा जून एक क्रांतियात्रा’ ह्या कोंकणी इतीहासीक पुस्तकाचे आर.एस.भास्कर हांणे केल्ले मलयाळम भाशांतर “पतिनेट्टु जूण ओरु क्रांतियात्रा” ह्या पुस्तकाचे केरळ राज्यपाल भौमानेस्त राजेंद्र विश्वनाथ आर्लेकार हाचें हस्तुकी प्रकाशन जातलें.
डाॅ.नितीन बोरकार, फेडरल बैक माजी अध्यक्ष श्री.के.पी.पत्मकुमार, आमदार श्री.टी.जे.विनोद, डाॅ.पूजा पी.बालसुंदरम, एन.एस.सरिता ही पुस्तक प्रकाशन सभेंत वांटेकार जातलें.
