नवी दिल्ली :
केंद्रीय गृहमंत्रालयान अत्यंत म्हत्त्वाचो निर्णय घेतला आनी देशभरांत वेगवेगळ्या राज्यांनी अडकल्ल्या स्थलांतरित कामगार, पर्यटक आनी विद्यार्थ्यांक आपापल्या घरा वचपाक मेळटलें. गृहमंत्रालयान अडकल्ल्या ह्या सगळ्यांक प्रवासाक मान्यताय दिल्या. केंद्रीय गृहमंत्रालयान हेसंबंदिचो आदेश जारी केला. तांकां व्हर-हाड करपाची वेवस्था राज्य सरकाराक करची पडटली. आपल्या आदेशांत गृहमंत्रालयान राज्यांना अडकल्ल्या लोकांक हेर राज्यांत धाडटना कसलोच गोंदोळ जावचो न्ही हेखातीर नोडल अधिकाऱ्यांची नियुक्ती करपाक सांगलां.आदेशाप्रमाण ह्या सगळ्यांक प्रवासाची मान्यताय दिवचे पयलीं तपासणी जातली आनी करोनाचीं लक्षणं नाशिल्ल्यांकच मान्यताय दितले.
आदेशांत कितें म्हणलां ?
लॉकडाउन खातीर जायते स्थलांतरित कामगार, भाविक, भोंवडेकार, विद्यार्थी आनी हेर लोक वेगवेगळ्या सुवातिंनी अडकल्यात. तांकां कांय नेमांक धरून आपल्या घरा धाडपाची मान्यताय दिल्या.
1. सगळ्या राज्यांनी नोडल अधिकाऱ्यांची नियुक्ती करप गरजेचें आसून अडकल्ल्या लोकांक धाडटना वा प्रवेश दितना प्रोटोकॉल पाळप गरजेचें आसा. राज्यांत अडकल्ल्या लोकांची वळेरी नोडल अधिकाऱ्यांनी तयार करप गरजेचें आसा.
2. जर एखाद्या ग्रुपाक एका राज्यांतल्यान दुसऱ्या राज्यांत प्रवास करायचो आसत जाल्यार दोनूय राज्यांनी एकामेकां लागीं संपर्क साधून रस्त्यान येरादारी करपाचेर मान्यताय दाखोवप गरजेचें आसा.
3. प्रवास करतले व्यक्तिचें स्क्रिनिंग करपाक जाय. ज्यांच्यांत लक्षणां नात तांकांच प्रवासाची मान्यताय दिवची.
4. प्रवासा खातीर बशिचे वापर करचो. ह्या बशिंचें निर्जंतुतीकरण करप तशेंच बशिंनी सोशल डिस्टन्सिंग पाळप बंधनकारक आसतलें.
5. आपणआक जाय ते सुवातीर पावतकूच संबंधित लोकांची आरोग्य कर्मचाऱ्यांनी तपासणी करची. तशेंच तांकां होम क्वारंटाइन करचें. गरज आसली जाल्यार संस्थात्मक क्वारंटाइन करचें. तांचेर भलायकी कर्मचाऱ्यां वरवीं नदर उरची पडटली.
