पणजी :
गोंय सरकारान विप्रो जीई हेल्थकेअरच्या साह्यान ‘स्मार्ट किऑस्क’ बसयल्यात. कोविड-19 चे लोकसंख्येचेर आदारून चाचण्यां खातीर ह्या किऑस्काचो वापर जातलो. ह्या उपक्रमाक लागून वेगान, दमदार आनी सहजसोपे पद्दतीन सँपल एकटांय करून सामाजिक पातळे वयल्या चाचण्यांची चडावत गरज भागोवपाक जातली.
विप्रो जीई हेल्थकेअरान आपल्या सीएसआर उपक्रमाच्या माध्यमांतल्यान राज्यभरांत अशा 12 ‘स्मार्ट किऑस्क’ची रचणूक करून ते बसयल्यात. हे किऑस्क फुडल्या वाठारांत कार्यरत आसात : वेरणा इंडस्ट्रिअल इस्टेट, म्हापशें इंडस्ट्रिअल इस्टेट, दाभोळी विमानतळ, मार्मागोवा पोर्ट ट्रस्ट आनी दोडामार्ग, केरी आनी पत्रादेवी हांगासरल्यो शिमो. ह्या ‘स्मार्ट किऑस्क’ची रचणूक विप्रो जीईच्या बंगळुरु हागाच्या इनोव्हेशन सेंटरांतल्या अत्यंत आधुनिक आनी एकमेवाद्वितीय अशा ई-क्यूब ह्या डिझाइन स्टुडियोंत केल्या.
सँपल एकटांय करतना भलायके कर्मचारी आनी नागरिक अशी सगळ्यांची सुरक्षितताय जपची हाची खात्री जावपा खातीर आमी अत्याधुनिक ‘स्मार्ट किऑस्क’ सादर केल्यात. गोंया कोविड-19 चो प्रसार आडावपाक हे किऑस्कांची खूब व्हड मजत जातली. अशें गोंयचे भलायकेमंत्री विश्वजीत राणे हाणी म्हणलें. “सध्या आमचेमुखार जें संकश्ट आसा अशे परिस्थितीक तोंड दितना सरकार आनी उद्देगांमदले हे परिणामकारक संबंध खूब म्हत्वाचे ठरतात. विप्रो जीई हेल्थकेअरान गोंयां 12 सुवातिंनी आगळे अशे नवीनच किऑस्क बसयल्यात. तांच्या सीएसआर उपक्रमांच्या माध्यमांतल्यान ह्या किऑस्काची रचणूक आनी उबारणी केल्ले खातीर हांव तांचो उपकारी आसां.
आपलें कर्तव्यकरता आसतना दोतोर आनी वैजकी कर्मचाऱ्यांकूय कोविड-19 ची लागण जाता, हें खूबच दुर्दैवी आनी दुखदिणे आसा. हातूंतल्यान उपचार पद्धतींतल्यो उणिवो मुखार येतात. अशें विप्रो जीई हेल्थकेअरचे वेवस्थापकीय संचालक नलिनीकांत गोलागुंटा हाणी म्हणलें. बंगळुरु हांगाच्या आमच्या डिझाइन टीमीन तयार केल्ल्या ह्या ‘स्मार्ट किऑस्काक लागून सँपल्स घेतना दुबावीत कोविड-19 दुयेंती आनी भलायके कर्मचारी हांच्यांतलो संपर्क उणो करपाक जाता, ताका लागून तांकां लागण जावपाची शक्यताय खूब प्रमाणांत उणी जाता. आमी ज्यासमुदायांत काम करतात तो समाज आनी लोकांचें आयुष्य सकारात्मक पद्दतीन बदलचें हो आमच्या सीएसआरचो मुखेल उद्देश आसा. ह्या पर्यायाची अंमलबजावणी करतना गोंय सरकारा वांगडा भागीदारी केल्ल्याचो आमकां आनंद आसा आनी हे प्रणालीचो वापर करूंक सोदतल्यांकआमी हे डिझाइन फुकट मेळोवन दितले.
कशें आसा स्मार्ट वॉक-इन सँपल कलेक्शन किऑस्क :
‘स्मार्ट किऑस्कांत दोन भाग आसात. एक नागरिकां खातीर आनी एक भलायके कर्मचाऱ्यां खातीर. हे दोनूय भाग पारदर्शक मात एअरटाईट म्हणळ्यार जे वारोय वचपाक शकनात अशे पद्दतीन पद्धतीने वेगळे करपाक आयल्यात. दोनय भागांक स्वतंत्र भितर सरपाक दार वीज आनी वारो खेळटो उरपाची सोय आसा. भलोयके कर्मचारी आनी नागरिकांमदीं संवाद साधपाक हातूंत माइक आनी स्पीकर आसात. मदल्या पार्टिशनांत बदलूंक येतात तशे ग्लव्हज आनी सॅनिटायझिंग जेल डिसपेंसर आहे. ताका लागून सँपल सुरक्षित पद्धतीन घेतलें म्हणपाची खात्री जाता.
अटेंडंट (पीपीई घाल्ले) पयलीं तपासपा खातीर येवप्यांची प्राथमिक म्हायती एकछांय करतले : सादारण म्हायती (वजन, पिराय, सद्या आशिल्लीं कसलींय दुयेंसां), व्यक्तीचे भोंवडेचो इतिहास, ते कोविड-19 दुयेंत्च्या संपर्कात आयिल्ले काय हें विचारतले आनी आयआर टेम्परेचर गनच्या साह्यान कुडिचें तापमान तपासतले. गोंय सरकार वापरता आशिल्ल्या अॅपार ही म्हायती सांठोवन उरतली. ते उपरांत नागरिकांक तपासणे खातीर सँपल मेळोवपाचे किट (स्वॅब) दितले. ते उपरांत तांकां सँपल कलेक्शन भागांत व्हरतले जंय भलायके आरोग्य कर्मचारी (जो दुसऱ्या भागांत आसा) सँपल घेतलो, स्वॅब त्या नागरिकाक परतो करतलो, नागरिकान स्वॅब थंय आशिल्ल्या ल्हानशी डबी आनी बाटलेंत दवरपाचो, ती डबी आइस बॉक्सांत उडोवपाची आनी भायर येवपाचें. दरेका सँपला उपरांत पुराय किऑस्क जंतूनाशकान स्वच्छ करतले.
