पणजी :
पावसाळ्यांत सांठो करून दवरपा खातीर चलत आयिल्ल्या ‘पुरुमेताच्या फेस्ता’ चेर अंदू लॉकडाऊनाक लागून हावन आयली. पूण राजधानी शारांत महापालिका मात शार आनी परिसरांतल्या लोकांक पावसाळ्यांत सांठावन दवरपा खातीर दर वर्सा प्रमाण कड्डणां आनी हेर जिनसांचो सांठो करपाक मेळचो हेखातीर फुडें सरल्या.
पणजेंत फाल्यां आयतारा सावन फुडले आठ दीस ‘ पुरुमेचें फेस्त’ जावपाचें आसा आनी सुमारेक पन्नास-साठ थळावे शेतकार आनी कुळागरी अळसांदे, सोलां, हुडीद, खारें नुस्तें आदी जिनस घेवन विकपाक बसतले. महापौर उदय मडकईकर हाणी पत्रकार परिशदेंत आज ही म्हायती दितना सांगलें, देड-दोन म्हयने पणजे आनी भोंवतणच्या वाठारांतले शेतकार आनी पिकावळी काडपी लोक आपलें उत्पन्न विकपाक शकले नात. तांच्या पोटापाणयाची व्हड समस्या निर्माण जाल्ली आसा.
सीएपीएफ कॅंटीनांत आतां फक्त स्वदेशीच…
शारांतले मार्केट इमारतींतल्या विकप्यां खातीर आमी आयनॉक्स फाटल्यान विक्रेची सोय केली. ‘पुरुमेताचें फेस्त’ मे म्हयन्याच्या पयल्या सप्तकांत चार दीस पणजेंत भरतालें. आठ ते धा विकपी कड्डणां तशेंच खारें नुस्तें घेवन विकपाक बसताले. पूण अंदू लॉकडाऊनाक लागून मे म्हयन्याचें पयलें सप्तक सुकें गेलें. थळावे विक्रेते, शेतकार हांच्या मनात गरजेच्या वस्तूंच्या विक्रीबाबतींत हुस्क्याचें वातावरण आशिल्लें तशेंच गिरायकां मदींय खास करून बायलां मदींय अंदू पावसाळो कसो वतलो हाचो हुस्को आशिल्लो.
थळाव्या शेतकाऱ्यांचे तळमळे आनी बायलांचो हुस्को वळखून आमी चार दिसांच्या जाग्यार आठ दीस हें फेस्त करपाचें येवजिलां. फाल्यां सावन आठ दीस कड्डणां आनी हेर वस्तू ‘सोशल डिस्टन्स’ चे सगळे नेम पाळून आमी करतले. दरेका विक्रेत्याक देड मीटराच्या अंतराचेर बसपाक लायतले. ताका लागून कोरोना संसर्गाचो धोको उरचो ना.
महापौर मडकईकार हाणी फुडें म्हणलें, ‘ राजधानीतली मार्केट इमारत उकती केल्यार आमी खूब दीस जाले. पूण थंय मोबाईल रिपेरिंग आनी दुरुस्तीचीं दुकानां थाटून बशिल्ल्या कांय दुकानदारांनी आगळीक केली. महापालिकेन पान – मसालो खावपाचेर तशेंच गुटखो हाचेर निर्बंध घाल्ले आसतना गुटखो- पान मसालो खावन इमारतीच्यो वणटी रंगयल्यात. हाका लागून मोबाईल विक्री आनी दुरुस्तीचीं ५० दुकानां आमी बंद केल्यांत. ह्या दुकानदारांक तांच्या खर्चान मार्केट धुवन निवळ करपाक सांगलां. तशेंच गाळ्यांच्या मालकीविशींचे आवश्यक ते दस्तऐवज सादर करपाक सांगलां. पानमसालो गुटखो खावन वणटी रंगोवपी थुंकी बहाद्दरांची आमी काकूळट करचेनात. महापालिका ह्याबाबतींत फुडेंय खर धोरण आंखतलें. ताका लागून कोणेच आमचे कडेन खेळचें न्हय अशी कडक शीटकावणीय महापौर मडकईकार हाणी दिल्या.
