कोंकणी भाशा मंडळान साबार ऑनलायन प्रकल्प चालीक लायल्यात. कोंकणी भाशे संदर्भांतले व्हिडिओ निर्मुपाचें काम मंडळान कांय म्हयन्या फाटीं हातांत घेतलां.
कोंकणी शिक्षणाच्या नदरेंत हो उपक्रम म्हत्वाचो आसा. ह्या उपक्रमाचो भाग म्हूण भाजयो, फळां, जनावरां, गिरे, गोंयचे जिल्ले आनी म्हाल आनी हेर विशयांचे कोंकणी आनी इंग्लीश शब्दांचेर व्हिडिओ तयार केल्यात. मंडळाच्या युट्यूब चॅनलाचेर हे व्हिडिओ उपलब्ध आसात. फुलां, झाडां, सवणीं, कड्डणां, मसाले, दुयेंसां ह्या विशयांचेर व्हिडिओ करपाचें काम चालू आसा. तशेंच फुडल्या टप्प्यांत कोंकणीची विशेशताय दाखोवपी व्हिडिओ तयार करपाचें आसात अशें मंडळान उजवाडायिल्ल्या प्रसिद्धी पत्रकांत म्हणलां.
‘लॉकडाऊन १५ दिसांनी वाडयात’
कोंकणी भाशा मंडळान कोंकणी उच्चाराचो एक व्हिडिओ उपक्रम सुरू केला. शब्दाच्या देवनागरी आनी रोमी कोंकणी उच्चारा सयत ताची व्याख्या आनी इंग्लीश अर्थ व्हिडिओच्या वर्णनांत दिल्या. कोंकणी भाशेंत अशे जायते शब्द आसात जे बरयतात एका तरेन पूण तांचे उच्चार वेगळ्या तरेन जातात. हो फरक सगळ्यांक समजुचो म्हूण हो उपक्रम सुरू केल्ल्याचे मंडळाचे अध्यक्ष चेतन आचार्य हांणी सांगलें.
कोंकणी शिक्षणाच्या मळार आशिल्लो उणाव भरून काडपा खातीर मंडळ सातत्यान काम करीत आसा. लॉकडावनाच्या काळांत शिक्षकांक ऑनलायन सामग्रीची गरज उप्राशिल्ल्यान मंडळान ऑनलायन साहित्य तयार करपाक सुरवात केल्या. ह्या उपक्रमां खातीर नामनेचे लेखक आनी अनुवादक मुकेश थळी तशेंच अनुवादक स्नेहा सबनीस हांचो मंडळाक हातभार लागला. ही सामग्री तयार करपाचो तंत्रीक भार पलाश अग्नी हांणी उबारला. मंडळान हालीच ऑनलायन शब्दकोश संकेतथळ आनी एप सुरू केला.
गोंय घटक राज्य दिसाच्या निमतान मंडळान खास फेसबूक लायव्ह कार्यावळीचें आयोजन केला. कोंकणी ऑनलायन उपक्रम आनी फुडाराची वाटचाल ह्या विशयाचेर 30 मे 2020, शेनवार, सांजे 5.00 वरांचेर, https://www.facebook.com/konkanibhashamandal.goa ह्या कोंकणी भाशा मंडळाच्या प्रोफायला वयल्यान ही लायव्ह कार्यावळ जातली. हे कार्यावळींत चेतन आचार्य
(अध्यक्ष, कोंकणी भाशा मंडळ), स्नेहा सबनीस (ऑनलायन उपक्रम मुखेली), पलाश अग्नी (तंत्रीक मुखेली), एविता डिसोजा (अनुवादक), अतिशा सुर्लीकार (शिक्षक), हृषिकेश कदम (कोंकणी कार्यकर्तो) सहभागी जातले. अन्वेषा सिंगबाळ कार्यावळीचें संयोजन करतलें.
