गोंय 

‘सुसंस्कृतीच्या नांवार गोंयकारांचेर अमानूशपणान अत्याचार केले’

पणजी :

पुर्तुगेजांनी सुसंस्कृतीच्या नांवार आमचेर अमानूशपणान अत्याचार केले. इन्किजिशनाच्या नांवार पिडापीड भोगयली. पूण गोंयकारांनी मुक्ती मेळयली. आयज हांव समाधानी आसां. कोंकणी खातिरूय आपणें वावर केलों. आयज कोंकणी खातीर नवे बरोवपी मुखार येतात. ही खोसदिणी गजाल अशें जेश्ठ साहित्यीक आनी स्वातंत्र सैनीक नागेश करमली हांणी सांगलें. गोंय क्रांती अमृत महोत्सव दिसा निमतान कोंकणी भाशा मंडळान आयोजीत केल्ल्या ऑनलायन कार्यावळींत तांणी गोंय मुक्तीच्या जैतीवंत इतिहासाचेर उलयतना आपल्यो 18 जूनाचेर यादी सांगल्यो.

गोंयच्या इतिहासांत क्रांती दिसाक मोटें म्हत्व आसा. डाॅ. राममनोहर लोहिया, टी. बी. कुन्हा, डाॅ. ज्युलियाव मेनेझीस, पुरूषोत्तम काकोडकार आनी हेरांनी 18 जूनाक क्रांती दिसा सिवील लिर्बटी म्हणल्यार स्वातंत्र्योत्तर चळवळीक सुरवात केली. ह्या सत्याग्रहांतल्यान प्रेरणा घेवन गोंयच्या तरणाट्यांनी हे चळवळींत आपखोशयेन उडी मारली. हांवूय स्वतंत्रताय होच ध्यास मानून मुक्ती संग्रामांत वांटेकार जालों. वत्सला कीर्तनी, कांता हेगडे देसाय, लक्ष्मीकांत भेंब्रे, बेर्था मिनेझीस, राम हेगडो, जुझे इनास, बाबू शिरोडकार आनी हेर  गोंयकारांनी बंदखण आनी ख्यास्त भोगल्यो. पूण आयज कांय लोक आमचीं फकांडां मारतात अशीय तांणी खंत उक्तायली. क्रिस्तांव गोंयकार भाव धरून हेर गोंयकार क्रांतीवीर क्रिस्तांव भावांनी गोंयचे मुक्तींत लढो दिला. हें विसरूंक फावो ना अशें तांणी फुडें उलयतना सांगलें.

मंडळाचे अध्यक्ष अन्वेषा सिंगबाळ हांणी डाॅ. राममनोहर लोहिया हांच्या फोटवांक हार घालून तांकां आर्गां ओंपलीं. मडगांवां कोंकणी भवनांत आयोजीत केल्ले कार्यावळींत  मंडळाची अध्यक्ष अन्वेषा सिंगबाळ, रवीन्द्र केळेकार ज्ञानमंदिर वेवस्थापन समितीचे अध्यक्ष प्रशांत नायक, विद्याभुवन कोंकणी शाळेच्या वेवस्थापन समितीचे अध्यक्ष चेतन आचार्य, रवीन्द्र केळेकार ज्ञानमंदिराचे मुख्याध्यापक अनंत अग्नी, विद्याभुवन कोंकणी शाळेच्यो मुखेली अक्षता व्यास हजर आसलीं.

गोंय सुटके चळवळींत वांटेकार जाल्ल्या ज्ञात – अज्ञात विरांक नमन करून, येवकार दितना अध्यक्ष सिंगबाळ हांणी समेस्तांक क्रांती दिसाचीं परबीं भेटोवन म्हळें, गोंयांत गोंयकार क्रांतीवीर नाशिल्ले जाल्यार घडये गोंयचें सपन साकार जावचें नासलें. स्वाभिमानी गोंयकार जागृत रावले. देखून आयज आमकां स्वातंत्र्य मेळ्ळें. आमकां तांचो अभिमान आसा. फुडारांत गोंयची अस्मिताय सांबाळूंक आमी वावरूंक जाय.

ही कार्यावळ मंडळाच्या यू-ट्यूब चॅनलाचेर पळोवंक मेळटा.
Share

Related Articles

Leave a Reply

Your email address will not be published. Required fields are marked *

Back to top button
error: Kindly Dont Copy !!