पणजी :
राज्यांत सद्या सुरू आशिल्लो लोकडाऊन 3 मे मेरेन आसा. मात राज्यांतले लोकडाऊन ३ मे मेरेनूच उरतलो काय वाडोवपाक येतलो हाचो निर्णय फाल्यांच्या पंतप्रधानांच्या मुख्यमंत्र्यां वांगडच्या व्हिडिओ कोनफरेन्स उपरांतूच जातलो. अशी म्हायती मुख्यमंत्री डॉ. प्रमोद सावंत हाणी दिल्या.
पंतप्रधान नरेंद्र मोदी हे फाल्यां देशांतल्या राज्यांच्या मुख्यमंत्र्यांकडेन व्हिडिओ कोनफरेन्स च्या माध्यमांतल्यान उलयतले. ह्यावेळार ते त्या त्या राज्यांतल्या कोरोना नियंत्रणाबाबतींत मुख्यमंत्र्यांलागीं चर्चा करतले. महाराष्ट्र आनी गुजरात राज्यांत कोरोनाचे दुयेंती वाडत आसात. हे फाटभुंयेचेर पंतप्रधान मुख्यमंत्र्यांक सल्लोय दितले. तशेंच लोकडाऊन वाडोवप वा सोंपोवप हाची घोशणाय ते करपाक शकतात. ताका लागून गोंयच्या लोकडाऊन चो फुडार फाल्यांच्या पंतप्रधानांच्या व्हिडिओ कोनफरेन्साचेरूच आदारून आसा.
मजगतीं गोंयांत ३ एप्रिल उपरांत एकूय नवो कोरोना दुयेंती सांपडूंक ना. आदीं जे सांपडिल्ले ते सातूय दुयेंती निवळ्ळे. हे फाटभुंयेचेर गोंयचें लोकडाऊन काडून सशर्त वेव्हार सुरू करपाक मान्यताय दिवपाक शकता. मात मात्र ३मे दिसा लोकडाऊन काडलें तरी खर नेमावली आनी कायदे तयार करून बंद आशिल्ले वेव्हार आनी हेर गजालींक ल्हवू ल्हवू परवानगी दिवपाक शकता.
