गोंय राजकीय

‘वावुरप्यांकडेन चर्चा करूनच काँग्रेसचो युतीचो निर्णय’

पणजी :
विधानसभा वेंचणुकेंत काँग्रेसी वांगडा युती करपाक राज्यांतले जायते पक्ष तयार आसात. पूण चाळीसूय मतदारसंघांतल्या काँग्रेस कार्यकर्त्यांची मतां जाणून घेवन ते उपरांतूच युतीचो निर्णय घेतले. काँग्रेस प्रदेशाध्यक्ष तशेंच प्रदेश काँग्रेस समितींतल्या बदला विशीं ज्येश्ठ फुडारी, पदाधिकारी, कार्यकर्त्यां कडेन चर्चा सुरू आसा. ह्या सगल्यांची मतां जाणून घेतले उपरांत ते विशींचो अहवाल आपूण पक्षश्रेश्ठींक धाडटलो. पक्षश्रेश्ठीच हे विशीं निमाणो निर्णय घेतले अशें काँग्रेसचे गोंय प्रभारी दिनेश गुंडू राव हांणी शेनवारा स्पश्ट केले.

काँग्रेस भवनांत घेतिल्ले पत्रकार परिशदेंत ते उलयताले. काँग्रेस प्रदेशाध्यक्ष गिरीश चोडणकार, विरोधी पक्ष फुडारी दिगंबर कामत, समन्वय समितीचे अध्यक्ष रमाकांत खलप ह्या वेळार उपस्थीत आशिल्ले.
येता ते विधानसभा वेंचणुकेंत भाजपाक हारोवप हेंच ध्येय काँग्रेसीन दवरलां. ते खातीर जायते पर्याय काँग्रेस कडेन उपलब्ध आसात. फुडल्या कांय दिसांत ह्या पर्यायांचोय योग्य पद्दतीन विचार जातलो अशें दिनेश राव हांणी म्हणलें.

चाळीसूय मतदारसंघांतल्या काँग्रेस समित्यांंच्या पुनर्बांदणीचें काम झुजा पांवड्यार सुरू आसा. काँग्रेस प्रदेशाध्यक्ष तशेंच प्रदेश काँग्रेस समितींतल्या बदला विशीं ज्येश्ठ फुडारी, पदाधिकारी, कार्यकर्त्यां कडेन चर्चा सुरू आसा. ह्या सगल्यांची मतां जाणून घेतले उपरांत ते विशींचो अहवाल आपूण पक्षश्रेश्ठींक धाडटलो. ते उपरांत पक्षश्रेश्ठीच हे विशीं निमाणो निर्णय घेतले अशें तांणी सांगलें.
काँग्रेस समित्यांक घटाय मेळ्ळे उपरातं विधानसभा वेंचणुके खातीर उमेदवार निश्चीत करपाची प्रक्रिया सुरू करतले. तशेंच बेगिनांत बेगीन उमेदवारांची घोशणा करतले अशेंय राव हांणी नमूद केले.

विधानसभा वेंचणूक नदरे मुखार दवरूनच मुख्यमंत्री डॉ. प्रमोद सावंत हांणी परतून एकदा 6 म्हयन्यांत 10 हजार सरकारी नोकऱ्यो दिवपाचें हांयस गोंयकारांक दाखयला. मुळांत भाजपान 2012 ची विधानसभा वेंचणूक, 2019तली पोट वेंचणूक तशेंच जिल्हो पंचायत वेंचणुके वेळार दोन म्हयन्यांत 15 हजार नोकऱ्यो दिवपाचे आस्वासन दिल्लें. पूण ते अजून पूर्ण करूंक ना. फुडल्या दोन म्हयन्यांत सरकारान 15 हजार नोकऱ्यो दिवपाचे तशेंच बेरोजगारांक भत्तो दिलोना जाल्यार काँग्रेस पक्ष रस्त्यार देंवतलो अशी शिटकावणी प्रभारी दिनेश राव हांणी दिल्या.

काँग्रेसचे जे आमदार भाजपांत गेल्यात तांकां परतून काँग्रेसीत घेवचे नात अशें दिनेश राव हांणी शेनवारा परतून एकदा स्पश्ट केले. फुटीर आमदार हेर पक्षांत गेल्यार त्या पक्षा कडेन काँग्रेस युती करतले व्हय? असो प्रस्न पत्रकारांनी केलो, ताचेर युती विशीं अजून निर्णय घेवंक ना. ताका लागून ह्या विशयाचेर सध्या उलोवप योग्य थारचे ना अशें तांणी म्हणलें.

कोरोना दुयेंसाच्या नांवा खाला केंद्र आनी राज्यांतले भाजप सरकारान व्हड भ्रश्टाचार केला. पुराय देशाचो विचार केल्यार गोंय सरकाराचो भ्रश्टाचारांत पयलो नंबर आसा असो आरोप दिनेश राव हांणी केला. काेरोना काळांत गोंयांतले प्रशासनूच कोसळ्ळा. मुख्यमंत्र्याचे सरकाराचेर कसलेंच नियंत्रण नाशिल्लें. ताका लागुनूच मंत्र्यां मदले मतभेद, वाद उक्ताडार आयले. ऑक्सिजनाच्या उणावाक लागून जायत्या नागरिकांक मरण आयलां. सरकारान ताचे कडेन आडनदर केली. हाचो बदलो नागरीक विधानसभा वेंचणुकेंत घेतले असो विस्वास तांणी उक्तायला.

Share

Related Articles

Leave a Reply

Your email address will not be published. Required fields are marked *

Back to top button
error: Kindly Dont Copy !!