पणजी :
गोंयां आयज सावन नुस्तेंमारी बंदी सुरू जाता आनी ती 31 जुलय मेरेन म्हणल्यार 47 दीस बंद उरतली. ट्रालर्सांक दर्यांत वचपाक मनाय आसून नुस्तेंमारी खातीर गेल्यार कारवाय जातली. राज्यांत हरशीं नुस्तेंमारी बंदी 1 जून सावन 31 जुलय मेरेन म्हणल्यार 61 दीस आसता. पूण अंदू केंद्र सरकारान लॉकडावनतचे फाटभुंयेर नुस्तेंमारप्यांचें उत्पन्न बुडिल्ल्यान नुस्तेंमारप्यांक थाकाय दीत नुस्तेंमारीबंदिचे बाबतींत 15 दिसांचो वेळ वाडोवन दिला. गोंय सरकारान हें मानून घेतिल्ल्यान नुस्तेंमारप्यांक थाकाय मेळिल्ली. पूण ती तशीं फायद्याची थरली ना. ह्या म्हयन्याचे सुरवेक सावन दर्यो खवदळिल्लो आशिल्लो आनी हवामान बिघजिल्लें आशिल्ल्यान ट्रॉलर्सांक जेटींचेरच नांगर घालचो पडलो.
शेती म्हालाक किमान आदारभूत मोलाच्या देडपट दर
मालिम जेटी राज्यांतली सगळ्यांत व्हडली जेची आसून सुमारेक 300 ट्रॉलर्स हे जेटीचेर आसात. हे भायर कुटबण, बेतुल, वास्को, शापोरा हांगाय ट्रॉलर्स आसात. हाका लागून राज्यांतल्या सगळ्या नुस्तेंमारी ट्रॉलर्सांचो आंकडो सुमारेक 1200 आसा. गोंया सावन केरळ, मंगळुरु, रत्नागिरीक नुसेतें निर्यात जाता. तशेंच कांय ठराविक नुसेतें परदेशांतय निर्यात जाता.
मजगतीं, मालिम फिशरमेन्स को ऑपरेटिव्ह सोसायटीचे माजी अध्यक्ष तशेंच ट्रॉलरमालक सीताकांत परब हाणीं म्हणलें, अंदू नुस्तें मारप्यां खातीर खूब कठीण काळ गेला. ओडिशा, झारखंडचे खलाशी लॉकडाऊनच्या काळांत गांवांनी परतले तशेंच नुस्त्याचो बाजारय बंद उरिल्ल्यान नुस्तेंमारी जावपाक पावली ना.
