पणजीः
शेनवारा राती कडेन एकाच वेळार 11 संसर्गीत दुयेंती राजधानी एक्स्प्रेसीन मडगांवां देवल्यात. सगळ्यांक मडगांवच्या कोविड ऑश्पितालांत दाखल केल्यात. हेच ट्रेनीन आयिल्ल्या संसर्गितांक लागून ग्रीन झोन आशिल्ल्या गोयांत फटाफट संसर्गित पिडेस्तांची संख्या वाडून 48 चेर पावली. 9 जण बरे जावन डिस्चार्ज घेवन गेल्ल्यान ऑश्पितालांत दाखल आशिल्ल्या संसर्गितांची संख्या 39 मेरेन सकयल आयिल्ली. आतां परतून ती 50 जाली.
10 दिसांत आनीक 2600 श्रमिक खास गाडयो धांवतल्यो
नव्या दुयेंतींत 7 बायलो जाल्यार 4 दादले आसात. एका 5 वर्सांच्या भुरग्याचोय तातूंत आसपाव आसा. ट्रुनेट चांचणेंत पॉझिटीव्ह मेळिल्ल्यान तांकां कोविड ऑश्पितालांत दाखल केल्यांत. गोमेकआँत पीसीआर चांचणे खातीरय तांचे लाळेचे नमुने धाडून संसर्गाची खात्रीय केली.
राजधानी एक्स्प्रेसीक गोंयांत थांबपाक गोंयकारांचो विरोध आशिल्लो. राज्यांतलो मुखेल विरोधी पक्ष कॉंग्रेस पक्षा सयत हेर सगळ्या पक्षांनी हे ट्रेनीक गोंयांत स्टॉप नाका अशी मागणी करून सरकाराचेर आरड मारिल्ली. रस्त्या वटेनय संसर्गीत येत आसात, पूण तांची संख्या खूब उणी आसता. भोवतेक सगळ्या नव्या संसर्गीतांक कसलींच लक्षणां दिसनासलीं.
