कोच्चींतु कोंकणी मोगी जण एकडे मेळनु दर वर्सा दिसम्बर म्हयन्यांतुले आखिरचे आयतारा “कोंकणी दिन” म्हणु मानोवप आसा. ह्या वर्सा कोंकणी केन्द्र- गोश्रीपुर संस्थेचे आभिमुख्यार दिसम्बर ३१ तारिकेक सांजे ४ वरांचेर श्री. एन. सदानंद कम्मत हांचे घराकडेन (पळ्ळं मार्ग, कूवप्पाडं, कोच्ची-२) ६०वें ‘शोभकृत मार्गशीर्ष’ कोंकणी कवी संगम घडयलें.
प्रार्थनेचे उपरांत कोंकणी केंद्र – गोश्रीपुर संस्थे वतीन एन सदानन्द कम्मत हाणी सगळे कवी गणांक येवकार दिलो.
त्या उपरांत घडयलेली कवी गोष्टींत आर. रामानन्द प्रभु (आवय भासे दीसु), एन. माधव रावु (कुचेल दिवस), के.एन.आर. भट (फुल्लेला नवें वर्ष), आर.एस.भास्कर (म्हजी लिखणी बरेयता आसा), जया बालकृष्ण कामत (देवाली महिमा), सुधीश एस. शेणै (आपण्याले दुःख), के. नारायण नायक (जय श्री राम), जी. मोहन रावु (नीळ वर्णांची भूर्गीं), एस. रामकृष्ण किणी (निवृत्ती), धन्या जी. मल्या (शीतळ झूझ), विजयकुमार एन. पै (एकांत), अनिता डी. किणी (नार्ला तुगेली महिमा अपार), कृष्णानन्द एम. पै (चंप्या सुगंधु), गोश्रीपुरं हरिकुमार (कोंकणी प्रवर्तन), एन सदानन्द कम्मत (गोश्रीपुरांतुली कोंकणी कविगोष्टी), एन. बालकृष्ण मल्ल्या (केवल एक पावल लागेन दवरी, हांव म्हाका सोदून) ह्ये कवीनीं आपआपली कविता सादर केली.
मागीर, वाचिल्या कवितेंचेर चर्चा घडली. चितरंजन हांणी कोंकणी केंद्र – गोश्रीपुर वतीन सगळ्या भाग घेवप्यांचे उपकार मानलो. प्रार्थनेचे उपरांत बसका सोंपली.
योगांत कोच्चीची प्रमुख स्तंभ लेखिका, इतिहासकार एवं अनुवादक डॉ. प्रतिमा आशर उपस्थित आशिल्ली.
