गोंयमनरिजवन/ खेळ

54वो इफ्फी शानदार उक्तावणाक सज्ज

गोंय राज्याक लखलखीत करपी भारताचो 54वो भारतीय आंतरराष्ट्रीय चित्रपट महोत्सव फाल्यां पणजेत शानदार उक्तावण सुवाळ्यान सुरू जातलो. केंद्रीय म्हायती आनी वितरावणी मंत्री, श्री. अनुराग ठाकुर डॉ. श्यामा प्रसाद मुखर्जी इंडोर स्टेडियमार कार्यावळीचें उक्तावण करतले. मंत्री, आयनॉक्स संकुलांत उक्तावणाच्या फिल्म निर्मात्यांक आनी कलाकारांक भौमानीत करतले. तशेंच मंत्री ठाकूर फिल्म बाजाराचें लेगीत उक्तावण करतले. फिल्म बाजार हो दक्षिण आशियांतलो सगळ्यांत व्हडलो संवसारीक फिल्म बाजार आसा, जो नेशनल फिल्म डेव्हलपमेंट कॉर्पोरेशन (एनएफडीसी) दर वर्सा इफ्फीच्या फाटभुयेर आयोजीत करता. फिल्म बाजार हो दक्षिण आशियाई आशय आनी प्रतिभेक, चित्रपट निर्मिती आनी वितरणांत आदार दिता. तशेंच दक्षिण आशियाई वाठारांत संवसारीक सिनेमाचो प्रसार करपाक फिल्म बाजार मजत करता.

इफ्फीच्या उक्तावण सुवाळ्यांत बॉलिवूड सुपरस्टार माधुरी दीक्षित आनी शाहिद कपूर हांचे परफॉर्मन्स आसतले. तशेंच उक्तावण सुवाळ्यांत बॉलिवूड स्टार श्रीया सारण, नुसरत भरूचा, पंकज त्रिपाठी, शांतनू मोइत्रा, श्रेया घोशाल आनी सुखविंदर सिंग हांचेय सादरीकरण आसतले. चित्रपट क्षेत्रातले नामनेचे व्यक्ती कॅथरीन झीटा जोन्स, सलमान खान, विद्या बालन, आयुष्मान खुराना, अनुपम खेर, विकी कौशल, सिद्धार्थ मल्होत्रा, अदिति राव हैदरी, ए आर रहमान, अमित त्रिवेदी हे कलाकार, गायक आनी चित्रपट निर्माते महोत्सवाक भेट दितले.

संवसारभरांतल्या प्रेक्षकांक आंतरराष्ट्रीय सिनेमा दाखोवपी णव दिसांच्या फिल्म महोत्सवाची सुरवात, पुरस्कार फावो जाल्ले ब्रिटीश फिल्म निर्माते स्टुअर्ट गॅट हाच्या ‘कॅचिंग डस्ट’ ह्या सिनेमाच्या आंतरराष्ट्रीय प्रीमियरांन जातली.

IFFI Goa

फिल्म महोत्सवाक आपलीं परबी दितना, श्री अनुराग ठाकुर हांणी सांगिल्लें, की ज्या युगांत तंत्रगिन्यान नवे पद्दतींक आकार दिता, त्या युगांत हो चित्रपट महोत्सव सिनेमॅटिक अणभवाच्या आकर्शणाची गवाय दिता. ताणी मुखार म्हळें, कि “इफ्फी सहकार, संयुक्त निर्मिती आनी अत्याधुनीक तंत्रगिन्यान स्थापन करपाक एक परिपूर्ण मंच जाला आनी आमच्या सिने निर्मात्यांच्या आवडीक लागून तशेच दिग्दर्शक आनी चित्रपट निर्मात्यां कडेन केल्ल्या सहकार्याक लागून, इफ्फी दर वर्सा मुखार पावला मारीत आसा’’.

अंदू वर्सा इफ्फीक व्हडा प्रमाणात प्रतिसाद मेळ्ळा. आंतरराष्ट्रीय चित्रपट सादरीकरणात 105 देशांतल्यान वट्ट 2 हजार 926 नोंदी आयिल्ल्यो, हो आकडो फाटल्या वर्सा परस तीन पटींनी चड आसा. णव दिसांच्या महोत्सवांत 270 परस चड चित्रपट, 4 सुवातानी दाखयतले. महोत्सवांत 13 संवसारीक प्रीमियर, 18 आंतरराष्ट्रीय प्रीमियर, 62 आशियाई आनी 89 भारतीय प्रीमियर चित्रपट प्रदर्शित जातले. बेसबऱ्या वेब सिरिज (ओटीटी) पुरस्कारा खातीर 15 ओटीटी माध्यमातल्यान, 10 भाशांनी वट्ट 32 नोंदी आयल्यात. अंदू गोल्डन पीकॉक पुरस्कारा खातीर 15 फिचर फिल्मां (12 आंतरराष्ट्रीय आनी 3 भारतीय फिल्मां) सर्तींत आसात.

डॉक्युमेंटरी फिल्म निर्मितीचें म्हत्व दाखोवपाखातीर अंदू डॉक्यू-मॉंटेज विभागूय सुरू केला. हाचे वांगडा युनेस्कोच्या आदर्शांक दाखोवपी, सात आंतरराष्ट्रीय चित्रपट आनी तीन भारतीय चित्रपट महोत्सवाच्या वेळार आयसीएफटी युनेस्को गांधी पदक पुरस्कार विभागात प्रदर्शित करतले.

नव्या प्रतिभेक फाटबळ दिवपाक, इफ्फीत नामनेच्या व्यक्तींची मास्टरक्लास, कार्यशाळा आनी पॅनल चर्चाय घडोवन हाडटले. महोत्सवांत 20 परस चड मुखेल कंपन्यो वेवसायीक मास्टरक्लास घेतले आनी 75 क्रिएटिव्ह माइंड्स ऑफ टुमॉरोच्या (सीएमओटी) वांगड्यांखातीर टॅलेंट कॅम्प घडोवन हाडटले.

एनएफडीसी फिल्म बाजारांत व्हीएफएक्स आनी टेक पॅव्हिलियन प्रदर्शीत करतले. तशेच डॉक्युमेंटरी आनी नॉन-फीचर प्रोजेक्ट/फिल्म, नॉलेज सिरीज आनी बुक टू बॉक्स ऑफिस लेगीत पळोवपाक मेळटलें. रिस्टोरड क्लासिक विभागाच्या एका नव्या उपक्रमांत, भारतीय क्लासिकाच्या इबाडिल्ल्या सेल्युलोइड रीलांतल्यान, नॅशनल फिल्म हेरिटेज मिशन (एनएफएचएम) खाला एनएफडीसी-एनएफएआयन केल्ल्या, संवसारीक दर्ज्याच्या पुनर्स्थापनांचे सात संवसारीक प्रीमियर आसतले. तशेंच हातूंतल्यान परतून तयार केल्ले, तीन आंतरराष्ट्रीय चित्रपट, महोत्सवांत दाखयतले.

catching dust IFFI Goa

भारत सरकाराच्या म्हायती आनी वितरावणी मंत्रालयाच्या केंद्रीय संचारण ब्युरोन लेगीत सर्जनशील व्हिज्युअल आशय आशिल्लें प्रदर्शन स्थापन केलां. तशेंच सिने मोगींक परस्पर संवादात्मक प्रदर्शनां वरवीं चित्रपटां विशीं शिकपाक मेळटलें. प्रवेश सगळ्यां खातीर फुकट आसा. हाचे भायर कारवां, शिगमोत्सव, गोवा कार्निवाल, सेल्फी पॉयंट, इफ्फी मर्चेन्डायज आनी हेर उपक्रमां वांगडाच, तीन सुवातींनी भौसा खातीर ओपन एअर पद्धतीन चित्रपट प्रदर्शित करतले.

मीडिया सुलभीकरणाचो एक भाग म्हूण, प्रेस इन्फॉर्मेशन ब्युरो (पीआयबी) महोत्सवा संबंदीत सगळ्या कार्यावळीं विशीं इंग्लीश, हिंदी आनी प्रादेशिक भाशांनी प्रसिद्धी पत्रका जारी करतले. थळाव्या माध्यमांखातीर पयलेच खेपे पीआयबी, कोंकणी भाशेंतय प्रसिद्धी पत्रका जारी करतले. पीआयबी सोशल मिडिया पंगड पत्रकार परिशद आनी हेर कार्यावळींचें लायव्ह प्रक्षेपण करतलो तशेच आपल्या सोशल मिडिया हँडलाचेर लायव्ह अपडेट घालतलो. पीआयबीन प्रसार माध्यमांक गरजेचो आदार दिवपा खातीर, मिडिया सुविधा केंद्र लेगीत सुरु केलां.

महोत्सवात खासा दिव्यांग प्रतिनिधींखातीर विस्तारान वेवस्था केल्या. तशेंच दृष्टिदोष आशिल्ल्यां खातीर एम्बेडेड ऑडियो आनी एम्बेडेड सांकेतिक भास उपलब्ध करतले. हाचे भायर वेगवेगळ्या भाशांनी डब केल्लीं भारतीय पॅनोरमा फिल्मांय दाखयतले.

संवसाराखातीर भारतांतलो एक व्हड चित्रपट महोत्सव म्हूण, इफ्फीक मुखार हाडपाखातीर फुडली सगळी तयारी पुरायपणान सुरू आसा.

महोत्सवाचो उक्तावण सुवाळो दूरदर्शनाचेर लाइव्ह प्रसारीत जातलो. व्हायकॉम मिडिया प्रा. लिमिटेड ही उक्तावण आनी समारोप सुवाळ्यांतल्या सांस्कृतीक सादरीकरणां खातीर एकमेव माध्यम आनी प्रसारण भागीदार आसा. देखून ते कलर्स टीव्ही चॅनल आनी तांचो ओटीटी प्लॅटफॉर्म जिओसिनेमाचेर सुवाळ्यांचें प्रसारण करतले.

Show More

Related Articles

Leave a Reply

Your email address will not be published. Required fields are marked *

Back to top button
Don`t copy text!