पणजी :
ग्रीन झोनात आशिल्ल्या गोंयांत कोरोनाचे आठ नवे दुयेंती सांपडिल्ल्ल्यान सगळ्याक हुस्क्याचें वातावरण पातळ्ळां. बुधवारा मुंबयच्यान गोयां पाविल्ल्या गोंयकार कुटुंबातले ५ सदस्य आनी चालक तशेंच एक गुजराती ड्रायव्हर आनी मुंबयवटयां गोयां पाविल्ल्या एका खलाशाचो हातूंत आसपाव आसा. ह्या आठ जाणांची काल रॅपीड टेस्ट केल्ली तातूंत सगळ्यांचे रिपोर्ट पॉझिटीव्ह आयिल्ते. ते उपरांत गोवा मेडिकल कॉलेजींतल्या व्हायरॉलॉजी लॅबांत तांची दुसरी टेस्ट केल्ती. तातूंतय सगळे रिपोर्ट पॉझिटीव्ह आयिल्ल्यान लोकां भितर हुस्को वाडला.
गोयांत हाचेआदीं सात कोरोना दुयेंती सांपडिल्ले. तांतले सजाण हे विदेशांतल्यान आयिल्ले गोंयकार आशिल्ले. जाल्यार एकलो तांच्यांतल्या एकल्याच्या संपर्कांत आयिल्ल्यान बाधित जाल्लो. हे सगळे दुयेंती बरे जावन घरा गेल्ले आसून तांची भलायकी आतां बरी आसा.
3 एप्रिल उपरांत गोंयां कोरोनाचो एकूय दुयेंत सांपडूंक नासलो. सारक्या 40 दिसांनी नवे सात दुयेंती सांपडिल्ल्यान बोवाळ पडला आनी लोकांची चिंता वाडल्या.सगळ्या कोरोना दुयेंतींक मडगांवच्या कोरोना ऑश्पितालांत दाखल केल्यात, थंय तांचेर फुडले उपचार जातले. हाते पयलींचे सातय दुयेंतींक बरे करपांत कोविड झुजाऱ्यांक यश आयिल्ल्यान हे दुयेंती लेगीत बरे जातले असो भरवंसो उकतायतात. नवे दुयेंती कोणाच्याच संपर्कांत आयिल्ले नाशिल्ल्यान तशी चिंता करपाची गरज ना अशी म्हायती मुख्यमंत्री प्रमोद सावंत हाणी दिल्या.
मजगतीं गोंयच्यो शिमो उकत्यो करच्यो न्हय, अशी मागणी आतां नेट धरपाक लागल्या. सध्या ट्रेन सुरु जावपाची आसून आतंरराज्य बसी आनी विमानसेवा सुरु जाली जाल्यार गोंयाक आशिल्लो धोको अधिक वाडटलो असो हुस्को लोक उकतावपाक लागल्यात.
गोंयच्यान वचप्यांची संख्या लेगीत वाडपाक लागल्या. आतां मेरेन रस्तो आनी रेल्वे मार्गान लागीं लागीं 21 हजार लोक गोंयच्यान आपआपल्या गांवा गेल्यात.काल बुधवारा सांजवेळा मडगांव स्टेशना वयल्यान हिमाचल प्रदेशांतल्या उना हांगा 1400 प्रवासी घेवन चौथी श्रमिक ट्रेन गेल्या. हाचे आदीं मध्यप्रदेशा खातीर एक तर जम्मू काश्मीरा खातीर 2 श्रमिक ट्रेनी सोडल्यात. तेच बरोबर रस्त्या वटेन सादारण 2 हजार लोक गोंया पावल्यात.
