कला-साहित्य

प्रकाश द. नायक​ हांच्यो दोन कविता… 

प्रकाश द. नायक​ हांच्यो आयजचें समाज वास्तव मांडपी दोन कविता…
….

 

गर्दी

सवणीं सुकणीं गितां गायतात
मळबांत तळपतो सुर्य आसा
पाचवे हरयाळेचेर
लख्ख उजवाड आसा
लोकांची गर्दी आसा
लांबचे लांब  रांक आसा
दवाखान्याभायर
गर्भाशय फोडपाखातीर…
शाळेभायर
प्रवेश घेवपाखातीर….
बॅंकेभायर
नोटी बदलपाखातीर….!

भायर
सुणे-कोले आरड मारतात
मळबांत उमाशेचो चंद्र…
न्हय ताचो फकत आभास आसा
गुप्प भयाण काळोख आसा
दवाखान्याभायर….
लोकांची गर्दी आसा
लांबचे लांब  रांक आसा
खाटी मेळोवपाखातीर…..
सिलींडराखातीर…
स्वास-उस्वासाखातीर….
एक सर्त आसा!

सर्त हारिल्ल्यांखातीर
थेट मसंड आसा
मड्यांची रास आसा
सरणांची गर्दी आसा
कल्पनेंतली रड आसा
मर्यादीत लोकांची गर्दी आसा
लाकडां ओली आसात
उजो खर आसा
घरांत दुकां सुकीं सुकीं आसात….
दुकांचीय गर्दी आसा…
………..
अश्रूधुंवरांच्यो नळकांड्योश्यो फोडल्या उपरांत
जाल्ली
निरव निखळ सामसूम….
उजो….
ज्योतीर्गमयम्!
​000
बाजार

प्रशस्त इस्पितळाभायर
बाजार भरला
बाजारांत पसरेच पसरे
मांडार मांड
घाऊक आनी किरकोळ!
मास्क, सेनिटायझर, हातमोजे,
पी पी ई, योगासनांची पुस्तकां,
अर्द-एक लिटर उदकाच्यो बाटल्यो,
थर्मास फ्लास्क, रित्यो बाटल्यो,
व्हील चेअरां, दोडपाच्यो खाटी, रेमडेसिव्हर,
फळां, शेंदऱ्यो, फुलांचे हार,
तुळशी माळो, चंदन, उजवाती, ‘धूप’
मड्यांच्या ताळवेर घालपाचें लोणी, गांवठी तूप,
धवी एलिफात, बुडकुले, लाकडां, शेणी,
बांबूच्यो रेडिमेड ल्हान मोट्यो निसणी,
पेट्रोल-डिजल वाडटा तश्यो
दर दिसा दर बदलपी
वेगवेगळ्यो एम्ब्युलंसी,
प्राणवायेचे सिलींडर,
आर्त किंळच्यांच्यो सिडी,
पन्नास-शंबर मिलीलीटरांच्यो
ल्हान सानश्यो दुकांच्यो बाटल्यो,
अस्थी भरून दवरपाक पारदर्शी विद्र….
इकराव्या दिसा करपाक घर पवित्र
पंचगव्य, गंगाजल आनी गोमूत्र ….!
‘बाब रे, कमी कांय जावंचें ना?’
“वाटपण नाका, हे घाऊक दर
आमकां तशें व्हडलें कांय सुटना,
त्या भायर राजाक ‘कमिशन’ दिवंचें लागता,
तेजेय म्हणोन पोट भरोकूंच जाये न्हू!”
‘दी तर, आनीक कितें करतलो?’
बुडकुलो घेतना-‘चील बी पडोंकना मरे हेका?’
“बाबा, पळोवन व्हर!
हांगां नशिबाकूच चिली पडल्यांत!!”
दोळ्यांतल्यान गळपी दुकां
मास्कार येवन थांबलीं-विरगळ्ळी!
‘एक सेनिटायझर दी’
सामान एंब्युलंसींत घालून
हातांक सेनिटायझ करीत तो गेलो!
एक ‘बाजार’ उलगलो!!
000

Share

Leave a Reply

Your email address will not be published. Required fields are marked *

Back to top button
error: Kindly Dont Copy !!