वास्को:
लॉकडाऊनाक लागून इटली राष्ट्रांत शिरकून उरिल्ल्या १६८ गोंयकार भावांक घेवन पयलें खास विमान बुधवारा (ता. २०) सकाळी १०.३० वरांचेर दाबोळी विमानतळाचेर देंवलें. इटली सावन गोंयां परतल्ले हे गोंयकार भाव तीन विदेशी तारवांचेर तारवटी म्हणून कामाक आसून दाबोळी विमानतळार पावतकूच तांची ‘कोविड – १९’ विशींची चांचणी करपा खातीर तांचे हांगा नमुने घेवन तपासणे खातीर धाजले. बुधवारा सांजवेळा आनी राती दो न खास विमाना इटलीसान विदेशी तारवांचेर तारवटी म्हण काम करतल्या गोंयकार भावांक घेवन येवपाचीं आशिल्ल्याची म्हायती दाबोळी विमानतळ संचालक गगन मलिक हाणी दिली.
बुधवारा सकाळीं १०.४५ वरांचेर इटलीसान गोंयकार भावंक घेवन आयिल्लें पयलें विमान दाबोळे विमानतळार देंवलें. विमान देंवल्या उपरांत सगळ्यो राटावळी पुराय करून उपरांत ह्या १६८ गोंयकार भावांची दाबोळी विमानतळाचेरच ‘कोविड – १९’ बाबतिंची तपासणी करपा खातीर नमुने (स्वेब टेस्ट) घेवपाक आयिल्ल्याची म्हायती दाबोळी विमानतळ संचालक गगन मलिक हाणी दिली. विदेशी तारवाचेर तारवटी म्हण काम करतल्या आनी लॉकडाऊनाक लागून विदेशांत शिरकल्ल्या गोंयकार भावांक गोंयां घेवन येवपी हें पयलें विमान आशिल्ल्याचें गगन मलिक हाणीं म्हायतींत कळयलें. बुधवारा हेर दोन विमानां इटली सावन गोंयकार भावांक घेवन येवपाचीं आसून तेवूय बी विदेशी तारवांचेर तारवटी म्हण कामाक आसात. दाबोळे देंविल्ल्या आनी उपरांत येवपाचीं आशिल्ल्या हेर दोन विमानींत मेळून वट्ट ४४१ विदेशी तारवांचेर तारवटी म्हण काम करपी गोंयकार भाव गोंया परततले म्हणपाची म्हायती मलिक हाणीं दिली.
सकाळीं पाविल्ल्या गोंयकार भावांची कोविड – १९ बाबतींत तपासणी करपा खातीर विमानतळारच नमूने घेतल्या उपरांत हांगां हाडून दवरिल्ले बसीन तांकां पोलीस सुरक्षेंत क्वारंन्टाईन केंद्राचेर (हॉटेलांत वेवस्था) घेवन गेल्ल्याची म्हायती गगन मलिक हाणीं दिली. इटलीसान हीं विमानां गोंयकार भावांक घेवन येवपाचीं आशिल्ल्यान दाबोळी विमानतळार कोरोना विषाणूचो धोको उपरासचो न्हय हेखातीर सगळे तरेचीं पावलां आधींच उखलील्लीं आशिल्ल्याचें मलिक हाणईं सांगलें. ह्या भावांची तपासणी करपा खातीर दोतोर तशेंच हेर कर्मचारी विमान पावचेआदींच दाबोळी विमानतळार हाजीर आसले. ह्या बरोबरच दाबोळी विमानतळाचेर येवपाचे आशिल्ल्या ह्या भावांची तपासणी करपा खातीर तशेंच हेर विविध पावलां योग्य तरेन उखलल्यांत म्हणपाची खात्री करून घेवपाक मुरगावचे उपजिल्हाधिकारी परेश फळदेसाई तशेंच हेर संबंधित अधिकारी हाजीर आशिल्ल्याचें दिसून आयलें. बुधवारा रातीं मेरेन दाबोळे हेर दोन विमानां इटलीसान गोंयकार भावांक घेवन आयल्या उपरांत तांची त्यांची कोविड – १९ बाबतिंत तपासणी करून उपरांत तांकां क्वारंन्टाईन केंद्राचेर (हॉटेलांत वेवस्था) घेवन वतले म्हणपाचें सांगलें.
