मडगांव :
समाजांतल्या वेगवेगळ्या प्रवाहांत हांव खूब फावटीं शेवटलां. त्या लोकांची जीण लागींच्यान पळोवपाची म्हाका संद मेळ्ळी. तांचीं दुख्खां, तांचे त्रास, तांचे क्लेश हाचो अणभव हांवें घेतलो आनी तें म्हज्या साहित्यांतल्यान भायर सरले. ते खातीर समाज जिणेचो म्हज्या साहित्याचेर चड प्रभाव आसा, अशें नामनेची साहित्यीक नयना आडारकार हांणी सांगलें. शेनवारा, 10 ऑक्टोबर 2020 दिसा, कोंकणी भाशा मंडळ, गोंयच्या कोंकणी वाचन विश्वा अंतर्गत मुलाखत कार्यावळींत त्यो उलयताल्यो.’नयना आडारकार हांच्या कवितांचेर चर्चा आनी कवी कडेन संवाद’ ही कार्यावळ ऑनलायन माध्यमांच्या आदारान जाली.
‘त्रिवेणी’ ह्या तांच्या कविता सादरीकरणाचे कार्यावळी वेळार मेळिल्ल्या तांच्या कांय सुखद अणभावाविशीं त्यो उलयल्यो. कविता फकत उतरांतल्यानूच न्हय, तर सादर करपाचे पद्धतींतल्यानूय ती कविता लोकां मेरेन पावता, अशें आडारकार हांणी सांगलें. ह्या वेळार तांणी आपल्यो कांय कविताय सादर केल्यो.कोंकणी भाशा चळवळींतल्या यादींचें पेटूल तांणी उगडलें आनी त्या कोंकणी कुटुंबाची व्हडवीक गायली. जेन्ना सगळे सोंपले अशें दिसता, तेन्ना आपलो फुडार अजून आसा हें लक्षांत दवरून जगपाची आस्त सतत राखून दवरपाक जाय, असो सल्लो तांणी कार्यावळीचो आस्वाद घेवपी नवे पिळगेक दिलो. कोंकणी वाचन विश्व ह्या उपक्रमा खातीर तांणी मंडळाक परबीं भेटयलीं.
युवा लेखक प्रणिता रेडकर आनी युवा कवी रजत हेगडे हांणी नयना आडारकारांच्यो, ‘पिशीं पिराय’, ‘तीं किळांच’; आनी ‘सगळें आतां इतिहासजमां’; ह्यो कविता सादर करून तांच्या कवितांच्या आशय-विशयांचें, काव्यात्मक भास शैलीचें विवेचन करून आपले विचार मांडले. कार्यावळीचो मुलाखतदार, युवा साहित्यीक अमेय नायक हांणी मुलाखत आनी चर्चा सत्र चलयलें. कार्यावळींत साहित्यीक, वाचक, शिक्षक, विद्यार्थी धरून 150 परस चड लोक वांटेकार जाल्ले. तशेंच फेसबूकार लायव्ह कार्यावळींतय लोक जोडिल्ले. कोंकणी भाशा मंडळाच्यो अध्यक्ष अन्वेषा सिंगबाळ हांणी येवकाराचें उलोवप केलें. जाल्यार सबिना मुल्ला आनी गोविंद मोपकार हांणी हे कार्यावळीचें संयोजन केलें.
कोंकणी वाचन विश्वाची फुडली कार्यावळ 28 ऑक्टोबर 2020 दिसा सांजेच्या 5 वरांचेर जातली. हे कार्यावळींत जेश्ठ साहित्यीक भो. दामोदर मावजो हांची नवी कादंबरी ‘जीव दिवं काय च्या मारूं’; हाचेर चर्चा जातली. युवा लेखक डॉ. तन्वी कामत बांबोळकार, सिनी फेर्नांडीस आनी गौरांग भांडीये कादंबरीचेर विचार मांडटले. साहित्यीक प्रशांती तळपणकार मुखेल उलोवप करतली.
