मडगांव :
चीनान भारताचेर केल्लो हल्लो हो पुर्वनियोजीत आशिल्लो अशां म्हणीत केंद्रीय रक्षा राज्य मंत्री श्रीपाद नाईक हाणी केंद्रांतलें मोदी सरकार आनी रक्षा मंत्रालय इतले दीस न्हिदो काडटालें हें मान्य केलें. ह्या आक्रमणाची नैतिक जापसालकी स्वीकारून रक्षामंत्री राजनाथ सिंह आनी रक्षा राज्य मंत्री श्रीपाद नाईक हाणीं आपल्या पदाचोराजनामो दिवचो अशी मागणी काँग्रेसचे गोवा प्रदेशाध्यक्ष गिरीश चोडणकर हाणी केल्या.
भाजपाक देशाचे सुरक्षेचें कांयच पडिल्लें नासून पंतप्रधान नरेंद्र मोदींचे व्यक्तीगत प्रसिद्धीचे लाड पुरोवपा खातीर भाजप सरकार फकत स्टंटबाजी करपांत धन्यताय मानता हें आतां उकतें जाल्लें आसा अशी टीका चोडणकर हाणी केल्या.
भाजप सरकार सत्तेर येत सावन फकत मोदींची व्यक्तिपूजा करपांत सगळ्यांचे सगळे केंद्रीय मंत्री आनी भाजपचे पदाधिकारी गुंतिल्ले आसून विदेश नीतीचें कसलेंच ठोस धोरण आज भाजप सरकाराकडेन ना हें परतून एक फावट स्पश्ट जाल्लें आसा. “लाल आंख” दाखोवपाची भास करतल्या नरेंद्र मोदींचेर आज नेपाळा सारखो ल्हान देश दोळे घुंवडायताही धपको दिवपी गजाल आसा. चीनाचे अध्यक्ष शी जिनपींग हांचे वांगडा गुजरातांत झोपाळ्याचेर बसून धोलप आनी महाबलीपूरम हांगा तांचे बरोबर दाक्षिण्यात वेशभूषा करुन आपणालेच फोटो काडून प्रसिद्धी मेळोवप हाचे भायर पंतप्रधान नरेंद्र मोदी हाणी देशहिता खातीप कसलींच पावलां उखलूंक नात हें आतां स्पश्ट जाल्लें आसा अशें चोडणकर हाणी म्हणलां.
भाजपाचें बेगडी देशप्रेम आनी निवडणुकी खातीर सैन्याचो वापर असल्या खेळांक आतां जनता पुराय वळखल्या आनी भारतीयांच्या देशप्रेमाचो आपल्या राजकीय स्वार्था खातीर फायदो करून घेवपाचो कुटील डाव आतां जनतेक कळून आयला.
केंद्रीय मंत्री श्रीपाद नाईक हेे सोबेचें बावलें म्हण मोदी मंत्रीमंडळांत आसून आज तांचे कडेन कसलेच अधिकार नात. आयुर्वेदीक वखदांनी इंग्लंडाचे राजपुत्र प्रिन्स चार्लस कोविड दुयेंसांतल्यान बरे जाल्ल्याचो दावो करून तोंडांत पडिल्ल्या उत्तर गोंयच्या खासदारांनी चीन हल्ल्याचेर केल्ल्या भाशणान गोंयाक लजेन मान बागोवपाक लायल्या अशी टीका चोडणकर हाणी केल्या.
