मडगाव:
लॉकडाऊन चालू आसतनाय म्हापसा अर्बन बँकेचो परवानो रिसर्व्ह बँकेन रद्द केल्ल्यान तीच वाट चलतल्या मडगाव अर्बनचें कितें जातलें काय हो हुस्को गुंतवणूकदारांक सतायत आसलो मात आरबीआयन बँकेची मुजत आनी तीन म्हयन्यांनी वाडयिल्ल्यान तीन म्हयन्याचें चडावत सलाईन मेळ्ळां.
आरबीआयन घालून दिल्ली मुजत 2 मे क सोंपताली. मंगळारा आरबीआयन नवें परिपत्रक जारी करतना ही मुजत 2 ऑगस्ट मेरेन वाडयल्या. सध्या हे बँकेंतल्यान गुंतवणूक दारांक 30 हजार रुपयां मेरेन रक्कम काडपाक मेळटा. मडगाव अर्बन बँक दिवळें काडपाच्य मार्गार आशिल्ल्यान एका वर्साआदीं आरबीआयन तिचेर निर्बंध घाल्ले. हे बँकेत हजारांनी लोकांच्या कोट्यांनी रूपये आडावल्यात. ह्या संदर्भांत बँकेचे सरव्यवस्थापक किशोर आमोणकर हांकां विचारलें तेन्ना ताणी सांगलें, मडगाव अर्बन ठाणे सहकारी बँकेंत विलीन करपाचीं उलोवणी चलतात, मात सध्या कोविडचे फाटभुंयेर हीं उलोवणी कांय काळा खातीर थांबल्यांत. पूण हेसंबंदी यशस्वी तोडगो काडपाक येतलो अशी अपेक्षा ताणी उकतायली.
