मुंबय :
आपल्या आंगांतले अभिनय शैलीक लागून बॉलिवूड आनी हॉलिवूडांत आपली वेगळी सुवात निर्माण करपी इरफान खान (irrfan khan) हांकां पिरायेच्या 53 व्या वर्सा मुंबयच्या कोकिलाबेन अंबानी ऑश्पितालांत मरण आयलें. 2018 त न्यूरोइंडोक्राईन ट्यूमरसारखें दुर्धर दुयेंस जातकूच तांचेर इंग्लंडांत उपचार सुरु आशिल्ले. तातूंतल्यान ते बऱ्यापैकीं सांवरिल्ले. पूण काल सांजवेळा पोटांतल्या संसंर्गाक लागून तांची भलायकी परतून एक फावट इबाडल्या उपरांत तांकां कोकिलाबेन अंबानी ऑश्पितालांत दाखल केले. त्यांचे फाटल्यान घरकान्न सुतापा सिकदर आनी बाबिल आनी अयान हीं दोन भुरगीं आसात.
इरफानच्या ‘पिकू’ सिनेमाचे दिग्दर्शक सुजीत सरकार हाणी आपल्या ट्विटर अकाऊंटा वयल्यान इरफान खान हांच्या मरणाची अधिकृत म्हायती दिली. ‘म्हजो मोगाळ इश्ट इरफान, तूं झुजलो, झुजलो आनी निमाणे मेरेन झुजत रावलो. म्हाका तुजो सदांच अभिमान दिसतालो. बेगीनच मेळुया. सुतापा आनी बाबिल हांचेप्रती सहवेदना. तुमी लेगीत तांचे खातीर झुजलीं. सुतापा तुवें तांच्या ह्या झुजांत शक्य जाता तें सगळें केलें. शांती आनी ओम शांती, इरफान खान सॅल्यूट’ असो संदेश सुजीत सरकारान नोंद केला.
फाटल्या शेनवारा इरफानच्यो आवय सईदा बेगम (95) हांकां मरण आयलें. लॉकडाउनाक लागून तांच्या निमण्या संस्काराक इरफान हांकां हाजीर रावपाक मेळ्ळें ना. तेखातीर व्हिडिओ कॉलच्या माध्यमांतल्यान ताणी आवयचें निमणे दर्शन घेतलें.
2019 त इंग्लंडांतल्यान परतून आयल्या उपरांत इरफान खान हाणी परतून एकदां चित्रिकरणाक सुरवात केल्ली. ‘अंग्रजी मीडिअम’ हातूंत तांची मुखेल भुमिका आशिल्लो निमाणचो सिनेमा मार्च 2020 त प्रदर्शित जाल्लो.
इरफान : द वॉरिअर
