काश्मीर :
भारत-पाकिस्तान शिमेर शेनवारा रातीकडेन परतून एक फावट दहशतवाद्यांलागीं सुरक्षा रक्षकांची बरीच लटाफट जाली. हे लटाफटींत दोन लस्करी अधिकाऱ्यां वांगडा तीन जवान शहीद जाल्यात. जाल्यार दोन दहशतवाद्यांक मारपांत जवानांक जैत मेळ्ळां. कुपवाडो जिल्ह्यांतल्या हंदवाडांत दहशतवादी आनी सुरक्षा रक्षकांभितर सुमारेक आठ वरां ही लटाफट चालू आशिल्ली.
शहीदांमदी २१ राष्ट्रीय रायफल्सचे युनिटचे कमांडिंग ऑफिसर कर्नल अशुतोष शर्मा हांचो आसपाव आसा. शर्मा हाणी हाचे आदीं जायत्या जैतिवंत काउंटर टेररिझम मोहिमांनी केल्ली म्हत्वाची भुमिका वाखाणपाची आशिल्ली.
कुपडावा जिल्ह्यांतल्या हंदवाडा शारांतल्या चांगिमुला हांगा कांय थळाव्या नागरिकांक दहशतवादी बंदी करतले अशी म्हायती गुप्तचर यंत्रणांनी लस्कराक दिल्ली. तेप्रमाण, हे सुवातीर लस्कर आनी जम्मू-काश्मीर पोलिसांची जोड मोहीम आंखिल्ली.
हंदवाडा मोहिमेच्या म्हणयारांनी सांगलें, दहशतवादी घुशिल्ल्या वाठारांत रावतल्या लोकांक भायर काडपाक लस्कराचे ५ जवान आणि जम्मू-काश्मीर पोलीस दलांतलो एक जवान अशा स जणांचे टीमीन हांगा प्रवेश केला. तेउपरांत ताणी हांगाच्या नागरिकांक सुरक्षितपणान भायरय काडले. मजगतीं, हांगा लिपून बशिल्ल्या दहशतवाद्यांक जवानांची सुलूस लागिल्ल्यान ताणी व्हडा प्रमाणाचेर फारपेट सुरू केलो. जवानांनीय तांकां नेटान परत्यो जापो दिल्यो. हातूंत दोन दहशतवादी मेले. मात, आपल्या दोन लस्कती अधिकाऱ्यांसयत दोन जवान आनी एक जम्मू-काश्मीर पोलीसांचा सब इन्पेक्टर अशे पाच जण शहीद जाले.
‘बलिदान केन्नाच विसरपाक जावचें ना’
काश्मीर खोऱ्यांतल्या हंदवाडा हांगा दहशतवाद्यांआड झुजतना शहीद जाल्ले अधिकारी आनी जवानांक पंतप्रधान नरेंद्र मोदी हाणी आर्गां ओंपल्यांत. “हंदवाडा लटाफटींत शहीद जाल्ल्या शूर जवानांक आर्गां, तांचो पराक्रम आनी बलिदान केन्नाच विसरपाक जावचें ना. ताणी पुराय मिश्ठेन देशाची सेवा केली. आपल्या नागरिकांच्या रक्षणा खातीर सुशेग घेनासतना कश्ट घेतले” अशें पंतप्रधान नरेंद्र मोदी हाणी दुखेस्त संदेशांत म्हणलां.
