पणजी :
विज्ञान तंत्रगिन्यान क्रांतीचो उपेग करून आपली भास आनी साहित्य चडानचड समृध्द करप ही काळाची गरज आसा. सध्याच्या इंटरनेट युगाखातीर तर साहित्य-संस्कृतीक जायत्या अर्थांनी भांगराळे दीस आयल्यात. अशा वेळार ह्या तंत्रगिन्यान -इंटरनेटच्या माध्यमांतल्यान कोंकणी भास पयस मेरेन पावपा खातीर सगळ्यांनी यत्न करप गरजेचें आसून, आपल्याकडलें समृध्द साहित्य जगभरांत वचपा खातीर इबुकीच्या माध्यमांतल्यान चडानचड कोंकणी पुस्तकां प्रकाशित जावपाची गरज आशिल्ल्याची अपेक्षा साहित्य अकादमी पुरस्कार कवी तशेंच गोवा कोंकणी अकादेमीचे अध्यक्ष अरुण साखरदांडे हाणी उकतायली. सहित प्रकाशनचे वतीन प्रकाशित आनी गौतम अनंत गावडे हाणी बरयिल्लें ‘क्वेशन मार्क’ ह्या कोंकणी नाटकाच्या इ बुकाच्या प्रकाशन कार्यावळींत ते उलयताले.
‘गुगल मिट’चेर ऑनलाइन पध्दतीन आयोजित हे कार्यावळींत राज्याचे कला आनी सांस्कृतिक मंत्री गोविंद गावडे हांचे हस्तुकीं ह्या कोकणी नाटकाच्या पयल्या इबुकचें प्रकाशन जालें. ह्यावेळार जेष्ठ नाटककार आनी चित्रकार श्रीधर कामत बांबोळकर आनी अरुण साखरदांडे हांची मुखेल उपस्थिती आशिल्ली.
गौतम गावडे हो उमेदी नाट्यलेखक, अभिनेतो, दिग्दर्शक आनी प्रभावी नाट्यशिक्षक आशिल्ल्याचें नमूद करीत गोविंद गावडे हाणी गौतमच्या ‘क्वेशन मार्क’ हाका सदिच्छा दिल्यो. कोंकणींत समृध्द नाट्यपरंपरा आसून ते परंपरेचो गौतम हो प्रयोगशील पाईक आशिल्ल्याचें गोविंद गावडे हाणी ह्यावेळार आवर्जून सांगत, कोंकणी साहित्य आतां ईबुकच्या माध्यमांतल्यान जागतिक साहित्य मंचाचेर आपली सुवात घेता म्हणपाचें खास कवतूक केलें.
ह्यावेळार लेखक गौतम गावडे हाणी आपलें मनोगत प्रकट केलें. कार्यावळिचें प्रास्ताविक सहित प्रकाशनचे वेवस्थापकिय संपादक किशोर अर्जुन हाणी तर सूत्रसंचालन अभिनेत्री ऐश्वर्या नायर हाणी केलें. हे ऑनलाईन प्रकाशन कार्यावळीक गोवा, केरळ, मुंबय, कर्नाटक आनी अमेरिकेंतल्यानय कोकणी मोगींनी उमेदी उपस्थिती नोंद केल्ली.
‘आतां जगभरांत पावतलें कोंकणी नाटक’
गोंयांतले आनी तातूंतय कोंकणीचे नाट्यपरंपरेंत मुखेलपणान सामाजिक प्रश्न हे प्रकर्षान मांडल्यात. पुंडलिक नारायण नायक हांच्या सारख्या नाटककारांक लागून कोंकणी नाटकाची वळख देशभर खऱूब भोवमानान सांगतात. अशा वेळार फाटल्या कांय वर्सांत नव्या लेखकांची पिळगी आपले परीन ही वळख चड घट करपाचो यत्न करीत आसा. अशा वेळार गौतम गावडे सारखो नवो नाट्यलेखक सामाजिक विषयाच्याय पेल्यान वचून मनोवस्थेचेर कोंकणीतल्यान प्रभावशाली नाटक बरयता ही खूबच म्हत्वाची आनी खास दखल घेवपाची गजाल आसा. गौतम पिरायेन तरणो आसलो तरी ताची नाटकाची समज दाद दिवपा सारकीच आसा, हें ताणें आजवेरच्या आपल्या लिखाणांतल्यान सिध्द केलां. ताका लागून ’क्वेशन मार्क’ अशेतरेन पारंपरिक पुस्तकाजाग्यार इबुक स्वरुपात आयिल्ल्यान आतां जगभरांतल्या नाट्यमोगीं मेरेन कोकणी नाटक पावपाक नक्कीच मदत जातली अशें श्रीधर कामत बांबोळकार हाणी ह्यावेळार सांगलें.
