पणजी :
नामनेचे लोककलावंत आनी लोककलांचे अभ्यासक कांता गावडे हांची गोवा कोंकणी अकादेमीच्या उपाध्यक्षपदाचेर आज निवड जाली. पाटो हांगाच्या गोवा कोंकणी अकादेमीच्या मुख्यालयांत जाल्ले उपाध्यक्षपदाचे वेंचणुकेंत कांता गावडे हांकां वट्ट 25 सदस्यांमदले 13 जाल्यार ज्येष्ठ पत्रकार आनी कवी संजीव वेरेंकार हांकां स मतां मेळ्ळीं. स सदस्य हाजीर रावंक नात.
फाटल्या अडेज दसकां सावन चड काळ कोंकणी चळवळींत सक्रिय आशिल्ले कांता गावडे हे लोककलांचे अभ्यासक म्हणून नामनेक आसाता. वेंचणुकेच्या निकाला उपरांत अकादेमीचे अध्यक्ष, ज्येष्ठ साहित्यिक अरुण साखरदांडे आनी सचिव उपासना माजगांवकर हाणी कांता गावडे हांचें अकादेमीचे वतीन अभिनंदन केलें.
आपले हे निवडीविशीं ‘गोंयकार’ वांगडा उलयतना ताणी सांगलें, गोंयची राजभास आशिल्ले कोंकणीची सेवा करपाची संद ह्या निमतान म्हाका दिल्ले खातीर सगळ्या सहकाऱ्यांचो हांव आङारी आसां. ह्या म्हज्या उपाध्यक्षपदाच्या कार्यकाळांत कोंकणी साहित्य आनी लोकवेद हांचे खातीर सक्रीयपणान कांय म्हत्वाचे उपक्रम म्हजे तकलेंत घोळटात. सगळ्यांच्या सहकार्यान ह्या उपक्रमांक दिशा दिवपाचे यत्न करतलो. हांव स्वत: लोककलाकार आसां, म्हज्या आजवेरच्या कामाचो अणभव ह्यामुखार अकादेमी खातीन दिवन कोंकणीच्या उज्वल फुडारा खातीर सदांच कार्यरत रावतलों.
