आयच्यो खबरोखबरोगोंयदेश-विदेशमनरिजवण - खेळसाहित्य - संस्कृतीहायलाइट

‘बडे अब्बू’ चो झारखंडांत जैतिवंत चौकार

० उत्कृष्ट सिनेमा सयत उखललीं चार बक्षिसां

पणजी (प्रतिनिधी) :
गोंयच्या ट्रक ड्रायव्हराची आनी ताच्या कुटुंबाच्या संघर्षाची कथा सांगपी बडे अब्बू ह्या कोंकणी सिनेमान झारखंडाक जाल्ल्या राष्ट्रीय चलचित्र महोत्सवांत सर्वोत्कृष्ट सिनेमा सयत चार महत्त्वाच्या पुरस्कारांचेर गोंयची खुणा कोंरांतली.
जमशेदपूराक 15 ते 18 ऑक्टोबर मजगतीं जाल्ल्या ह्या सिनेमहोत्सवाचो समारोप आनी पारितोषिक वितरण नावाजते चित्रपट लेखक-दिग्दर्शक इम्तियाज अली आनी मानेस्तांचे हाजेरींत जालो. ह्यावेळार सर्वोत्कृष्ट सिनेमो, सर्वोत्कृष्ट दिग्दर्शक (नितीन सुपेकर), सर्वोत्कृष्ट अभिनेतो (राजेश शर्मा), सर्वोत्कृष्ट संकलन (निलेश गावंड) अशीं चार पारितोषिकां ‘बडे अब्बू’ न उखललीं.
कोंकणी आनी हिंदी अशा दोन स्वतंत्र भासांनी एकाचवेळार चित्रित जाल्ल्या ‘बडे अब्बू’ सिनेमाच्या कोंकणी आवृत्तीची निवड झारखंडाक जाल्ल्या राष्ट्रीय चित्रपट महोत्सवांत जाल्ली. ह्या महोत्सवांत निवड जाल्लो हो आयजवेरचो पयलो आनी एकमेव कोंकणी सिनेमा आशिल्लो. हो सिनेमा महोत्सवांत प्रदर्शित जातकूच सगळ्या प्रेक्षकांनी आनी मानेस्तांनी उर्बेभरीत प्रतिसाद दिलो. हिंदी भाशीक राज्यांत कोंकणी सिनेमाक मेळिल्ल्या ह्या उपाट प्रेमा खातीर सिनेमाचे निर्माते शामराव यादव आनी शांती दिलीप बोरकर हाणी रसिकांचे उपकार मानल्यात.
महोत्सवांत ह्यावेळार दिल्ल्या धा मदलीं सर्वोत्कृष्ट सिनेमा, सर्वोत्कृष्ट दिग्दर्शन, सर्वोत्कृष्ट अभिनेतो, सर्वोत्कृष्ट संकलन हीं चार म्हत्वाचीं पारितोषिकां मेळयत बडे अब्बून भितर सरतनाच जैतिवंत चौकार मारिल्ले खातीर रसिकांकडसून बडे अब्बू चमूचेर तोखणायेचो पावस पडटा.

निर्मिती उपरांतचें हें एक वर्स आनी त्या आदींचो सादारण देड वर्सांचो काळ आमी सगळेजाण ‘बडे अब्बू’चें सपन उकत्या दोळ्यांनी जगताले. सिनेमा उत्तम जाला हेविशीं आमची खात्री आशिल्लीच पूण तो आतां विविध भाशी प्रेक्षकांक आनी मानेस्तांक आपलोसो दिसता हें चड धादोसकायेचें आनी उमेद वाडोवपी आसा. झारखंड महोत्सवांत मेळिल्ली उर्बा हें आमकां सगळ्यांक आनी गोंयच्या सिनेमा खातीर मोलाचें आसा.
शामराव यादव, शांती दिलीप बोरकर
निर्माते, बडे अब्बू सिनेमा.

दिग्दर्शनाखातीर मेळिल्लें बक्षिस तशें पळयल्यार पुराय टीमीचें आसा, कित्याक तर कोंकणी भाशेंत सिनेदिग्दर्शनाचो हो म्हजो पयलोच यत्न आशिल्लो. पूण गोंयचे निपूण कलाकार आनी म्हजे सगळे तंत्रज्ञ सहकारी हांकां लागून सिनेमा कला, आशय विशय आनी तांत्रीक नदरेन बरो करप आमकां शक्य जालें. म्हाका मेळिल्लो हो पुरस्कार म्हणल्यार गोंयच्या सिनेमाचो, कोंकणी भाशेचो भोवमान आसा अशें हांव मानतां.
– नितीन सुपेकर,
दिग्दर्शक, बडे अब्बू.

Share
Show More

Related Articles

Leave a Reply

Your e-mail address will not be published. Required fields are marked *

Back to top button
error: Content is protected !!
Close