आयच्यो खबरोखबरोदेश-विदेशफीचरसाहित्य - संस्कृतीहायलाइट

नामनेचे साहित्यिक किरण नगरकर अंतरले

मुंबय :
साठोत्तरीच्या दसकांतले मुंबयच्या मनशांचे निम्नमध्यमवर्गीय आयुश्य, तातूंतलो खुराडेपणा, शारीर वेव्हारांतली ऊर्जा आनी अपरिहार्यता हांकां मराठी आनी इंग्लीशींतय एकेच ताकदीन मेकळ्या-ढाकळ्या निसर्गिक शैलींत मांडपी कादंबरीकार किरण नगरकर हांकां बिरेस्तारा मुंबय मरण आयलें. तांची पिराय 77 वर्सांची आसली.
फाटल्या कांय दिसां सावन ते दुयेंत आशिल्ले. दोन दिसां आदीं तांकां बॉम्बे ऑश्पितालांत उपचारां खातीर दाखल केल्ले. मेंदवांतल्यान व्हांवतल्या रगतान तांकां मरण आयलें. शुक्रारा सकाळीं तांचे मेल्ले कुडिचेर निमणे संस्कार जातले.
मराठी चाळ संस्कृतिक पटलाचेर व्हरपी ‘रावण ॲण्ड एडी’, ‘द एक्स्ट्रॉज’ आनी ‘रेस्ट इन पीस’ ह्या तांच्या कादंबरी त्रयींतल्यान ताणी मुंबयचो धा दसकांतल्या सामाजिक, राजकी आनी सांस्कृतिक घुसळणीचो तिरकस भाशेंत आढावो घेतला. तांच्या मराठींतल्या पयल्या ‘सात सक्कं त्रेचाळीस’ हे कादंबरीन मराठी साहित्यविश्वांत आकांताचो खवदळ घातलो. हे कादंबरीची मोकळीढाकळी निसर्गिक शैली, तातूंत सतत जाणवून येवपी एके तरेचो तिरसटपणा, काळ आनी अवकाशाची परत परत जातली उलटापालट करून केल्ले आशयसूत्रांचे मांडणीतलें नाविन्य वा कादंबरीचे पारंपरिक संकेतव्यूह न्हयकारपी प्रयोगशील रचनाबंध हाका लागून कादंबरीभोंवतणी वादाचें मोहळ जालें.
ह्या वादा उपरांत जायरात विश्वांत काम करपी नगरकरांनी मराठींत बरोवपातें टाळ्ळें. फुडें ‘रावण आणि एडी’ हे तांचे पयलेच इंग्लीश कादंबरीन तांचे कडेन जगभराचें लक्ष गेलें. गॉड्स लिटिल सोल्जर, रेस्ट अँड पीस आनी दोन वर्सां आदीं उजवाडाक आयिल्ली जसोदा : अ नॉवेल हे इंग्लीशींतले निर्भीड आनी वोगळे धाटणीच्यो कादंबऱ्यो वाचकांक भावल्यो. बेडटाइम स्टोरी, कबीराचे काय करायचे, स्ट्रेंजर अमंग अस, द ब्रोकन सर्कल, द विडो ऑफ हर फ्रेण्डस्, द एलिफंट ऑन द माऊस, ब्लॅक टुलिप ह्या तांच्या नाटकांनीय रसिकांच्या मनाचेर राज्य केलें. समाजांतले दांभिकतेचेर ताणी आपल्या लेखनांतल्यान भाष्य केलें.

Share
Show More

Related Articles

Leave a Reply

Your e-mail address will not be published. Required fields are marked *

Back to top button
error: Content is protected !!
Close