आयच्यो खबरोकॅम्पस खबरोखबरोगोंयदेश-विदेशफीचरमनरिजवण - खेळसाहित्य - संस्कृतीहायलाइट

भांगरा महोत्सवी इफ्फी चें बिगुल वाजलें…

पणजी :
इफ्फीचें अंदू भांगरा महोत्सवी वर्स आशिल्ल्यान आयोजनांत कसलीच उणीव उरची न्हय हेखातीर सुकाणू समितिची बसका आज गोंयां जाली. अंदुचे इफ्फींत रशिया वांटेकार जावपाची शक्यताय आसून ऑस्कर अकादमीचे अध्यक्ष जॉन बेली हे गोयांतले इफ्फीक खास हाजेरी लावपाचे आसात.
पत्रकार परिशदेक गोवा मनोरंजन संस्थेचे उपाध्यक्ष माजी आमदार सुभाष फळदेसाई, सुकाणू समिती वयले मधुर भांडारकर, केंद्रीय म्हयती प्रसारण खात्याचे अधिकारी, चित्रपट महोत्सव संचालनालयाचे अधिकारी आनी हेर मानेस्त हाजीर आशिल्ले.
बसके उपरांत केंद्रीय म्हायती तथा प्रसारणमंत्री प्रकाश जावडेकर हाणी पत्रकार परिशदेंत ही म्हायती दिली. ताणी म्हणलें, ‘अंदू २० नोव्हेंबर ते २८ नोव्हेंबर अशे णव दीस इफ्फी चलतली. इफ्फीचें अंदुचें ५० वें वर्स आशिल्ल्यान खाशेल्या उपक्रमांचे आयोजन आसा. सुकाणू समितीचेर बॉलिवूड निर्माता-दिग्दर्शक करण जोहर, सिद्धार्थ राय-कपूर, फिरोज अब्‍बास खान, सुभाष घई आदी मानेस्तांनी वांचेकार जावपाचें निश्चित केलां. हे भायर आनीक दोन- तीन नावां आसपावन घेवपाचीं आसात.

जावडेकर हाणी म्हणलें, येता त्या चार म्हयन्यात गरज ती सगळी तयारी पुराय करून अंदुचो इफ्फी यशस्वी करतले. राष्ट्रपिता महात्मा गांधी हांची ह्या वर्सा १५० वी जयंती, ताका लागून महात्मा गांधी हांचे संबंदीत खास प्रदर्शन आसतलें. राष्ट्रीय तसेच आंतरराष्ट्रीय थरा वयले फिल्म मळा वयले मानेस्त व्हडा संख्येन हाजीर रावतले.
इफ्फी यशस्वी करपा खातीर देशांतल्या सात व्हड शारांत ‘रोड शो’ करपाचे आसात. चित्रपट मळा कडेन संबंधितां मेरेन पावपाचो यत्न जातलो. ह्या भायर बिझनेस प्रदर्शनूय आसतलें, जातूंतल्यान फिल्म मळा वयल्या अद्ययावत तंत्रगिन्यानाची म्हायती मेळटली. अंदुचे इफ्फीचें आनीक खाशेलेपण म्हणल्यार विद्यार्थ्यांकूय हातूंत आसपावन घेतले. फिल्म अँड टेलिव्हिजन इन्स्टिट्यूटचे विद्यार्थी तशेंच सिने मळा लागीं संबंधित शिक्षणिक संस्थांचे विद्यार्थी हांकांय आसपावन घेवपाक येतलें. कांय बरीं चलचित्रां इत्सा आसूनय लोकांक पळोवपाक जमना. ताका लागून अंदू खाजगी थिटेरांतल्यानय हीं चलचित्रां प्रदर्शित जातलीं, अशेंय जावडेकर हाणी म्हणलें.
सर्गेस्त मुख्यमंत्री मनोहर पर्रीकर हांकां इफ्फींत आदरांजली अर्पित करपाक येतली. तेखातीर खास कार्यावळ आसतली अशें एका प्रस्नाचेर उलयतना जावडेकरांनी स्पश्ट केलें. जावडेकरांच्या हस्तुकी हाया वेळार इफ्फीच्या पोस्टरंचें अनावरण जालें. ह्या वेळार ताणी म्हणलें, ‘ सप्टेंबर अखेर मेरेन सगळया विभागांतलीं चलचित्रां निश्चित जातलीं. वर्ल्डकपा प्रमाण चार म्हयने आदीं सगळी वेवस्था आसची आनी ते प्रमाण चलचित्रांच्यो तिकेटी लोकांक आरक्षित करपाक येवच्यो हेखातीर आमी पावलां उखलपाचे आसात आनी फुडल्या वर्सा सावन ही वेवस्था करतले’.

मुख्यमंत्री प्रमोद सावंत हाणी म्हणलें, मुळाव्यो सुविधा आनी इफ्फींत वाटेकार जावपी मानेस्त तशेंच प्रतिनिधींच्या सरबरायेंत कसलीच उणीव उरची ना. अंदुचो भांगरा महोत्सवी इफ्फी यादस्तेंत उरतलो हाची जतनाय सरकार घेतलें. लोकांक इफ्फींतलीं चलचित्रां पळोवपाक मेळनात. तांचे खातीर खाजगी थेटरांत चलचित्रां दोखोवपाची वेवस्था करतले. इफ्फीचे व्यवस्थेंत कसलीच उणीव उरपाक दिवचे नात अशी खात्री प्रमोद सावंत हाणी ह्या वेळार दिली.

Share
Show More

Related Articles

Leave a Reply

Your e-mail address will not be published. Required fields are marked *

Back to top button
error: Content is protected !!
Close